Aputaajaasoq: Naammagisimaarinnittoqarnissaa unamminarnerpaajuvoq
Aputaajaasartoq Lars Peter Hansen marlussoriarluni unilatsiareersimavoq, taamaattorli suli unnugu arfineq pingasut tungaanut aqquserngit ilaat Iiminaq apummik assallatseriffigalugu aqqutigiuassavaa.
Ukiuunerani aputaajaasarneq ullaassakkut allartinneqakkajuppoq. Lars Peter nalunaaqqutaq pingasunnguinnartoq makittarpoq, silasiorniassagami. Apilluariaraangallu piareersariarluni aputaajaaneq aallartittarpaa. Inuit ullaakkut suliartunnginnerisa nalaani angallaffissaq piareersarlugu. Ukiorpassuarnilu taamatut suliuarsimavoq. Lars Peter Hansen oqaluttuarpoq ilaqutarisami maanna maqaasiunnanngimmanni, akunnerpassuarni aputaajaasarnini akornutissaqartinnagu. Ukiorpassuanngulerpummi nuleernertut inuulerami, susassaaleqinnginnerussagamilu aputaajaasarpoq.
Aputaajaanermini pingaartittarpaa inunnit naammagittaalliortunit sianerfigiteqattaannginnissani.
- Inuit tamaasa naammagisimaarinnitsissinnaagukkit taava suliara iluatsittumik ingerlassimassavara. Naammagittaattoqaraangat, taava suliaq iluamik naammassineqarsimasanngilaq, Lars Peter Hansen oqarpoq. Nuummi ualisoq qannerpoq, biilinillu aquttut mianersorlutik ingerlaartuarput. Lars Peter taamaalluni aputaajaanermini apingaarmat isikkivilutsittilluni biilinik apuingajavissimavoq, qujanartumilli susoqanngilaq. Taamaattoq aqquserngit sinaaniittumik qullermik apuisimavoq, tamannalu immaqa aputaajaasartut tamarmik misigisimassavaat, Lars Peter oqarpoq.
