Aput ulapaartitsisoq
Aput sinerissatsinni sumiiffiit ilaanni erininarsivissimalluni takkuteqqimmat ulapputtunnguaqarpoq.
Sisimiuni ulluni pingasuni qimussernersuaq siullermeerluni misiligutaasoq ippassaq aallartittoq ingerlalluarpaluppoq. Qimussit 14-it timmut ippassaq aallaramik 56 kilometerini ingerlaareerlutik illuaqqani unnuipput. Kangerlussuup tungaanut ullumi 50 kilometerini ingerlaariarlutik illuaqqanut utissapput Sisimiunut aqagu apuutissallutik, taama aaqqissueqataasoq Frederik Kleist nalunaarpoq.
Oqaatigineqarpoq Uummannap eqqaaneersut Nukannguaq aamma Edvard Samuelsen maannamut siuttuusut. Nunatsinni qimussimik arfininngorpat apriilip aallaqqaataani pissartanngorniunniuttoqassaaq.
Pitinnaguli Nunarsuarmi sisoraatinik oqilaniunnerit artornarnersaattut taaneqartartoq Arctic Circle Race Sisimiuni tallimanngorpat aallartissaaq.
Nuummi pisunut ikaarsaariarutta, taava oqaatigisinnaavarput meeqqat sangusaarlutik pissartanngorniunnerat ullaaq silapilunnera pissutigalugu ullumi aamma unitsiinnarneqarmat. Sisamanngornermi unamminerit aallartittut aqagu sapaammi ullaakkut qulinut nanginnissaat naatsorsuutigigini, aaqqissuisunit Ove Heilmann ilisimatitsivoq.
Nuummi apummik ilusilersuinissaq kinguartinneqareersoq ulluni tulliuttuni qanoq apitiginissaa apeqqutaatillugu qaqugu pinissaa ataasinngorpat nalunaarutigineqarumaartoq, Nuuk Tourismimi pisortaq Flemming Nicolaisen ullumi oqarpoq.
