Aput ipertooq silaannaap kissatsikkaluttuinnarneranut pissutaaqataagunarpoq

Gassimik CO2-mik aniatitsineq silaannaap kissatsikkiartuinnarneranut pissutaatinniarneqartarpoq, allamilli aamma pissuteqarunarpoq.

Tassa USA-mi Californiami universitetit ilaanni ilisimatuut ilimagaat aput ipertooq silaannaap kissatsikkiartuinnarneranut pissutaaqataalluinnartoq.

Biilit pujoorfimminnit paamik aniatitsisarput, pujoorfiit allat paamik aniatitsisarput, orpippassuillu ikuallattut paamik aamma siaruarterillutik.

Paaq anorimit siaruarterneqarnermigut apummut nakkaasarpoq, apullu ipertuunngortittarlugu. Aput ipertooq seqernup qinngornerinik millugussisarpoq, silaannarlu kissatsikkaluttuinnartarlugu. Akerlianik aput ipertunngikkaangat seqernup qinngorneri silaannarsuarmut utertinneqartarlutik, silaannarlu kissatsikkaluttuinnartarani.

Ilisimatuut University of California Irvine-imeersut misissuereerlutik nalunaarusiorput, Journal of Geophysical Research-imilu saqqummersinneqarluni.

Inuiaqatigiit ukiut 200-t matuma siornatigut suliffissuaqalermatali nunarsuatta silaannaa agguaqatigiissillugit 0,8 gradinik kiatsinnerulersimavoq, issittumilu silaannaq 1,6 gradinik kiatsinnerulersimalluni.

Internetimi nittartagaq Science Daily taama allappoq.