Apussuit siunissaqarnerat upperaat

Apussuit sisorariartarfiannik ingerlatsineq tigoqqullugu Namminersornerullutik Oqartussanit neqeroorutigineqarmat Maniitsup kommunea isumaqarsimagaluarpoq ingerlassinnaallugu.

Apussuit ingerlanneqarnissaannut takorluukkat piviusorsiorpaluppallaarsimanngitsut, Apussuit siulersusuni siulittaasoq, Søren Lyberth isumaqarpoq.

- Isumaga malillugu takorluukkersaarutit annertuallaarsimapput, pilersaarutillu ilaatigut piviusorsiortumik ingerlasimanngillat. Naqqaninngaanniit piorsarlugu ingerlanneqarsimassagaluarpoq, Søren Lyberth oqarpoq.

Apussuit ineriartortinneqarnerat inuiaqatigiinnut ikinnerpaamik 8 milliuunit koruunit missaanni aningaasartuutaasimavoq.

Apussuit siunissaat pillugu Greenland Tourismemi takornarianik siunnersorti Mads Skifte ima nalilersuivoq:

- Illuaraq sananeqartoq kingulleq assorujussuaq pitsaavoq. Isumaqarpunga tamatuma kingorna aatsaat avammut nittarsaannissaanut tuniniarnissaanullu tunngavissaqalersoq. Aqqusinniarineqarsimasoq allakkut sananeqarsimasuuppat aasaanerani sivisunerusumik Apussuit atorneqarsinnaassagaluartoq, Mads Skifte aamma oqarpoq.

Apussuit siunissami akilersinnaasumik ingerlanneqarsinnaasoq, Søren Lyberthip ilimagaa:

- Ukiuni taakkunani Apussuarniittarninni upperilernikuuara, siunissami imminut akilersinnaalluni ingerlalerumaartoq. Piffissaq ingerlatsinerlu sukanganerusoq tamatumani apeqqutaaginnarput, akilersinnaalluni ingerlalernissaanut, Søren Lyberth oqarpoq.

Piginnittuulersut aallartisarnerannut Maniitsup Kommunea katillugit 300.000 koruuninik aningaasaliissuteqarpoq.

Piginnittuulersullu naatsorsuutigaat Apussuarnik ingerlatsilernerminni milliuunit missaanik aningaasartuuteqassallutik.

Apussuarnik namminersorlutik piginnittuulersut tassaapput, Maniitsumi sanaartornermik suliffeqarfik Sukaq Aps piginneqatigalugit Jørgen Lynge aamma Gedion Jørgensen.