Apussuarni sisorariartarfik namminersortunut tunineqalerpoq

Maniitsumi namminersortoq sisorariartarfimmik Apussuarmik ukiortaamit ingerlatsilersussaq, Apussuarliartartussat nunat allamiut amerlisarniarpai, ingerlatsisunngortussallu naatsorsuutigaat Apussuarmut sisorariartussat siulliit apriilip aallaqqaataani sisorariarumaartut.

Maniitsup Kommuneata sisorariartarfik Apussuit ingerlakkumajunnaarmagu koruunilerlugu namminersortumut tunivaa. Naaminersortumi Sukaq Apsimi piginnittoq Karl Erik Karlsen ingerlatsilernissaminut isumalluarpoq, Apussuarni illut inissisimaffissat ukiut siuliinili sananeqartareersut maanna arlaqalereermata.

Sapinngisamik nunanit allaneersut amerlasuut Apussualiarnissaat siunertaralugu Maniitsumi takornariartitsivik suleqatigalugu nunatta avataanut siullermik nittarsaassilluarnissaq suliarineqalerpoq.

Apussuarmik ukiortaamiit piginnittunngorluni ingerlatsilersussaq namminersortoq karl Erik Karlsen aamma oqarpoq Apussuarmukartigani Apussuit ataat uninngaartarfiliarineqarsinnaasoq.

Apussuarni isumannaallisaanissaq eqqarsaatigalugu Apussuit ataani marlunnik illuaraliornissaq eqqarsaatigineqarpoq, illuaraliornissamullu ilutigitillugu qajartuartitsinisalernissaq aalisariartitsisalernissarlu inerisarneqassasut, Karl Erik Karlsenip oqaatigai.

Apussuit Maniitsup kommuniata 2002-mili kisimiilluni ingerlatarilerpaa. Namminersornerullutik Oqartussat Maniitsullu Kommunia 1990-ip qiteqqunnerani piginneqatigiillutik aamma ingerlappaat, taamanimi takorloorneqaraluarpoq unnuisarfiit 400-nik siniffittallit pilersinnississaat.