Apummik ilusilersuisoqassanngilaq

Nuup aputikippallaarnera peqqutaalluni illoqarfimmi apummik ilusilersuinissaq ukioq manna taamaatiinnarneqarpoq. Tamannalu pissutigalugu aaqqissuisuusut ukiup tullissaanut sermeq atorlugu ilusilersuisoqassasoq siunniuppaat.

Aqqissueqataasussaagaluartup, Flemming Nicolaisen-ip, apinngitsoornera assut ajuusaarutigaa, taamaalillunilu Nuummi Apummik Ilusilersuinissaq 2007 taamaatiinnarneqartariaqarsimavoq.

- Tamanna assorsuaq ajuusaarnarpoq, apummik ilusilersuinissaq illoqarfiup avataanut takoqqusaarusiaralutigu tuniniarnera ingerlassimagatsigu. Tamannami navianaateqarsinnaavoq, soorlu assersuutigalugu, Kroatiamiit apummik ilusilersuisartut peqataasussaagaluarput, apummik ilusilersuinermik ingerlatsisinnaajunnarnerput tatigineqaatitsinnut ajortisaataasinnaammat. Flemming Nicolaisen Radioavisimut taama oqarpoq.

Taamaattumik Flemming Nicolaisenip apummik ilusilersuisarneq taamaatillugu 2008-mi Sermeq atorlugu ilusilersuisarnermik nutaajusumik taarsiinnarnissaa eqqarsaatigaa.

- Apummik ilusilersuisarnermut taartaasinnaalluarpoq sermerli atorlugu ilusilersuineruinnarluni. Sermit 3 x 3 meterisut angitigisut atortariaqassavavut, illoqarfimmimi qerititsiveqarpoq, taamaattumik sermiliornissaq ajornartorsiutaanavianngilaq. Sermerlu atorlugu ilusilersuisitsinissami nalunaaruteqaraangatta ullussarititaasoq uniorneqartassanngikkaluarpoq, taama oqarpoq; Flemming Nicolaisen.

Aqutsisooqatigiit ukiup ingerlanerani sermeq atorlugu ilusilersuisoqartassanersoq aalajangiivigiumaarpaat.