Nuummi apummik ilusilersuilluni unamminissaq unitsinneqariaannaavoq Nuummi massakkorpiaq aputeqanngilluinnangajammat.
Apummik ilusilersuinissaq sapaatip-akunneranik ataatsimik kinguartereeraluartoq sapaatip-akunneranik ataatsimik kinguarteqqinneqartoq, Nuummi takornariaqarnermut pisortaq Flemming Nicolaisen ilisimatitsivoq.
Tassalu apummik ilulisilersuilluni unamminissaq nutaanik ullulerneqarpoq marsip 31-ianiit apriilip pingajuat ilanngullugu ingerlanneqartussanngorluni, silali matumani naalagaalluinnartussaasoq Flemming Nicolaisen oqarpoq.
Apummik ilusilersuinissamut holdit 25-it peqataaniarlutik nalunaarsimapput. Danmarkimilu silasiorfiup ullunut tulliuttunut silassamik ilimasaarutaa naapertussagaanni Nuummi ulluni qaninnerni nittaallissangatinneqarpoq.