Nuummi apummik ilusilersuilluni unammisitsineq marsimi pisussaasimagaluarluni aputaasallunilu silarloqattaarmat kinguartinneqarpoq, ataasinngornermi naammassineqarpoq.
Unammisitsinermi ilusilersueriaatsit marluk atorneqarput. Tassa figurativimik non-figurativimillu taaneqartut. Ilusilersukkanillu nalileeqataasussaq, eqqumiitsuliortoq Niels Motzfeldt, ilusilersueriaatsit taakku marluk ima nassuiarpai: - Isip ilisareqqajaasai figurativimik taasarpagut. Imatut paasillugu: Oqaluttuatigut takusartakkatigullu erninnaaq isip ilisariuminartitai figurativimik taaneqartarput. Non-figurativimik taasartakkavut tassaapput ilisarnanngilaartut, eqqumiitsuliortorpalaarnerusumik suliat, apummik ilusilersuinermi nalileeqataasoq Niels Motzfeldt oqarpoq.
Naliliisartut naliliinerminni aputip kipparissup tunniunneqartup qanoq atorluarneqartigisimanersoq isiginiartarpaat. Pilersaarutaasimasumullu suliaq qanoq qanitsiginersoq aamma isiginiarneqartarluni. Tassa suliap ilivitsuusumik passunneqarnera isiginiartarpaat, kiisalu suliap oqaluttuarnera oqariartuutaalu aamma isiginiarneqartarluni.
Non-figurativimik ilusilersuisuni ajugaapput Qeqqata Ilinniarnertuunngorniarfiani ilinniartut. Taakku suliaat “Flagrende Papir”-mik taaneqarsimasoq ajugaasuummat.
Eqqumiitsuliornermik Ilinniarfimmi ilinniartut figurativimik ilusilersuinermi ajugaasuupput. Eqqumiitsuliortunngorniat suliaat “Taqqama”-mik atserneqarsimavoq.
Ajugaasuni peqataasut tamarmik immikkut ukkusissamik qulluliamik pinnapput. Normu 2-nngortut 3-nngortullu aamma qullimik pinnapput.