Nuummi ukioq manna apummik ilusilersuinissaq qanilliartupallappoq. Ullut aqqanillit qaangiuppata nuummiut iligiikkuutaat 25-t apummik ilusilersuillaqqinneqqusaatissapput.
Sapaatip-akunnerini kingullerni Nuummi kiarujussuartarnerata kingunerisaanik aput aakkiartupallappoq, tamannali aaqqissueqataasup Flemming Nicolaisenip Nuuk Tourismimeersup, aarlerissutiginngilaa.
- Sila ulluni tulliuttuni neriulluarfigaarput. Sapaatip-akunnerata tulliani aputit ilusilersugassat karsinut katersorlugit aallartissaagut, kinguartitsinissarlu maannangaaq isummerfigerusunngikkallarpara, Flemming Nicolaisen oqarpoq.
Apummik ilusilersugassat Inussiviup eqqaanut ukioq kingullermisuulli inissinneqassapput.
Nuuk apeqqissappat arfineq-pingajussaanik apummik ilusilersuisoqassaaq.