Applenut immiutit ulorianarpa?

iPhoneimut batteriimik immiutit ajoquteqartut, kissatsippallaarlutillu ikuallalersinnaasut Applep 2014-imi paasivaa. Macinut, iPadit ilaannut iPhonenullu immiutit qupinnguallatsitsisinnaagunartut ukioq manna paasivaat. Immiutillu taakku akeqanngitsumik Applep taarserniarpai.
Allattoq Camilla Dam
marsip 29-at 2016 14:40

Macinut, iPadit ilaannut iPhonesinullu batteriinik immiutit europamut 2003-mit 2015-imut nassiussat pineqarput, immiutillu amerlaqisut pineqarlutik.

Immiutit taarsigassaanersoq ajornanngitsunnguamik nammineq paasiniarsinnaavat. Immiut isaterukku ikkuffimmullu ikkuttartoq alakkarlugu, kisitsisit sisamat tallimat allassimasussaanngillat, assit qulaaniittut takukkit. Naqinnerit taamaallaat pingasut allassimasussaapput, soorlu EUR, KOR, AUS, ARG imaluunniit BRA, immiut taama allassimasoqaruni ajunngilaq taarsertariaqaranilu.

Assi © : KNR

Immiut ajoqutilik taarsertarialik ima isikkoqarsinnaavoq.

- Pisisartut isumannaatsuunissaat Applep pingaartitaraa, kajumissutsitsinnillu aalajangersimavarput immiutit pineqartut tamaasa nutaamik ajoquteqanngitsumik akeqanngitsumik taarsissallugit, Apple Danmarkip nittartagaani tamanna atuarneqarsinnaavoq.

Applep nittartagaatigut taarsiissaasi

Nunatsinni immikkut Applenik tuniniaasoqanngilagut. Nuummilu Elgiganten Nota Benelu Applep nittartagaani una toorlugu immiutit ajoquteqarpat taarsissagit oqaatigaat. ’Danmark’ toqqassavat Appleutivillu serienummeria allallugu. Immersuininni Apple id-it aamma atussavat. Immersuereeruit Applep immiutinnut atortussamik nutaamik nassissavaatit, ajoqutilillu allakkat-puuat nassiussaat atorlugu utertissavat.

iPhone 3GS-inut, 4-nut aamma 4S-inut immiutit ikuallattoorsinnaasut

iPhoneimut batteriimik immiutit ajoquteqartut, kissatsippallaarlutillu ikuallalersinnaasut Applep 2014-imi nassuerutigaa. Immiutit saattukujuut iPhone 3GS, 4 aamma 4S-inoortut pineqarput. Immiut CE-mik aamma A1300-imik (assi qulaaniittoq takuuk) allassimasoqarpat taarsissaaq.

Poorski sioqqutilaarlugu Ejner Jensenip immiutini ikiuallaleriasaarsimanera KNR-imut oqaluttuaraa.

Elektronikkikkulli atortut unnuakkut immerneqartarnerat Danmarkimi isumannaallisaaniat mianersoqqussutigaat. Ullukkut immiisarnissaq innersuussutigaat, ikuallattoqalissagaluarpat taamaalinikkut paasilertorneqarsinnaaniassammat.