Appat toqungasut tusintilippassuit Alaskap sineriaani nassaarineqartut
Alaskap kujasinnerusortaani, Prince William Sundip sineriaani, apparpassuit toqungasut nassaarineqarsimapput, pingaartumik illoqarfeeqqap Whittierip, Alaskami uuliap ruujorikkut aqqutaata qanittuani.
Decembarip qiteqqunneranit maannamut appat toqungasut 8000-it missaat sissami nassaarineqarsimapput, meterimut appat toqungasut tallimat missiliorlugit.
USA-p ujarassiuutut misissuisoqarfianeersut sinerissami sumiiffinni allani appanik toqungasunik nassaassaqarnersoq maanna misissuleruttorpaat.
John Piattip, USA-p ujarassiuutut misissuisoqarfiani pinngortitami uumassusilinnik ilisimatuup, nutaarsiassaqartitsivimmut Alaska Dispatchimut oqaatigaa timmissanik toqungasunik takusani quarsaarutigisimallugit.
Apparpassuit suna toqqutigisimaneraat ilisimaqqissaarneqanngilaq, John Piattilli maluginiarsimanerarpaa aalisakkat appat nerisartagaat itinerusumiittalersimasut, silap pissusiata allanngoriartornerata malitsigisaanik imaq kissatsikkiartulersimammat.
- Aamma suli ilisimasaqarfigilersimanngisatsinnik nappaalasoqalersimanera pissutaasinnaavoq. Aamma anorersuaqattaarsimavoq, tamannalu appat ingerlaarfigisartagaannik allanngortitsisimasinnaalluni, John Piatt oqarpoq.
Appat nassaarineqartut saluttupilussuusimapput, taamaammat aamma perlerlutik nukillaarlutillu toqusimasinnaallutik.
Ikiuiniaqatigiiffiit sinerissami sumiiffinni arlalinni appanik suli uumasunik annaassiniarlutik maanna katersuileruttorput.
