Appat toquinnarsimasut timmissat nualluutaannik nappaateqarput

Appat nammineerlutik toqorarsimasut, kujataani martsip qaammataani naammattoorneqartut, timmissat nualluutaanik viruseqartut paasineqarpoq. Asiap Kangisissuani timmissat nualluutaatut uloriarnartiginngitsoq, uumasut Namminersortuni oqartussani uumasut nakorsaanni qullersap Asbjørn Brandtip oqaatigaa.
Allattoq Dorthea Johansen
juunip 16-at 2014 10:12

- Uumasut inuillu tamarmik nualluuteqartarput. Una timmissat nualluutaat timmissanut allanut tunillaassinnaavoq, uumasut nakorsaanni qullersaq Asbjørn Brandt oqarpoq.
 
Taassuma erseqqissaatigaa, timmissat nualluutaat Asiap Kangisissuani timmissat nualluutaatut uloriarnartiginngitsoq. Napparsimalissutaarujussuarneq ajortoq, timmissallu nujuartat napparsimavallaartitsisuunngitsumik nappaateqartarnerat nalinginnaasuusoq, Asbjørn Brandtip aamma oqaatigaa.
 
Virusip H11N2-p timmissanit inunnut tunillaasinnaanera uppernarsineqarsimanngilaq.
 
Appat nammineerlutik toqorarsimasut martsip qaammataani Nanortallip Narsallu akornanni naammattoorneqartut  Danmarkimi DTU Veterinærinstitutimut misissugassanngorlugit nassiunneqarsimapput.
 
Misissuinermilu timmissat nualluutaat napparsimavallaartitsisuunngitsoq subtype H11N2 nassarineqarpoq. Timmissat anguffasillit timmissat nappaataannit virusinut nalinginnaasumik akiuussinnaassusilerujussuupput, napparsimalissutiginagulu uumasunut tunillaassuisuusinnaallutik.
 
DTU Veterinærinstitutimit ilisimatitsissutigineqarpoq timmissat suna toqqutigisimaneraat qularnaatsumik oqaatigineqarsinnaanngitsoq.

Taamaakkaluartoq uumasut toqungasut naammattoorneqartut attorneqannginnissai innersuussutigaa.
 
- Sillimanissaq eqqarsaatigalugu uumasut toquinnarsimasut attorneqassanngillat.  Nualluuteqarsinnaanissaat eqqarsaatigalugu. Timmissat nualluutaat qaqutikkut inunnut tunillaattarpoq. Massakkut appat ajorluinnartumik nualluuteqanngillat. Taamaakkaluartoq timmissanik toqungasunik naammattuuisoqarpat attorneqasanngillat, Namminersorlutik Oqartussani uumasut nakorsaat qullersaq Asbjørn Brandt oqarpoq.
 
Inuit virusimik taassuminnga timmissanit tunillatsissimasunit timmissat nappaataannik tunillatsissinnaanerat annikitsuararsuuvoq. Taamaattorli Kalaallit Nunaanni Uumasut Nakorsaqarfik Inuussutissalerinermullu Oqartussaaffiup inuit kaammattorpai timmissanik pisaminnik suliarinninnerminni qanoq iliornissaminnut naleqquttumik ima piareersaateqartaqqullugit:
 
- Assatit qaqorsaaserlugit asakkit, pingaartumik erlaveersereerninni.
- Timmissat erisarnagit amiikkit (pujoralatserinnginneruvoq).
 
Timmissat toquinnarsimasut oqartussanik isumaqatigiissuteqareernikkut taamaallaat passunneqartariaqarput.
 
Nualluutip virusia ooqqissunngorlugit siatsinikkut/uutsinikkut toqunneqartarpoq.
 
Kalaallit Nunaanni pinngortitami timmissanik amerlasuunik nukillaangarpasittunik toqungasunilluunniit nassaaraanni Kalaallit Nunaanni Uumasut Nakorsaqarfik Inuussutissalerinermullu Oqartussaaffik sukumiinerusumik ilitsersorneqaqqulluni attavigineqarsinnaapput.