Appat pillugit siunnersuineq puupassaarussutigineqarpoq
Oqallinnermi arlaleriaqaluni oqaatigineqartarpoq uumassusilerisunngooq oqaatigisaraat appat nunatsinniittut nungutaalersut. Tamanna ilumuunngilaq.
Tamatumunnga atatillugu uumassusilerisut oqaatigaat, appat ineqarfiisa ilaat nungutaanissaminnut ulorianartorsiortut.
Uumassusilerisut oqaatigaat, Nunatsinni appat piaqqisartut tamakkiisumik amerlassusiat 15 procentimik ikileriarsimasut. Aamma Qaanaap eqqaani appaqassuseq aalaakkaasumik inissisimasoq naatsorsuinermi ilanngutinngikkaanni Nunatta sinnerani ikileriarneq 35 aamma 40 procentip missaanniippoq.
Nunatsinni appat ineqarfii ullutsinni 19-iupput, taakkunannga aqqaneq marluk ikiliartorfiullutik, appaqassutsimillu misissuinerup nalaani appat ineqarfii tallimat appaarussimallutik.
Tamatuma peqatigisaanik appat ineqarfiini arfinilinni pissutsit ajorluinnartumik inissisimasutut nalilerneqarput. Pineqartut tassaallutik Upernaviup kujataa, Qeqertarsuup Tunua, Kujataa aamma Illoqqortoormiut eqqaat. Taaneqartuni appat piaqqisartut 62 procentit aamma 74 procentit akornanni ikileriarsimapput.
Unioqqutitsilluni appanniartarnerit Nunatsinni appat ikiliartornerannut pissutaasutut Pinngortitaleriffimmit tikkuarneqarsimasoq, tusagassiuutini aamma ersersinniarneqarpoq. Tamanna aamma ilumuunngilaq. Appat ikiliartornerinut patsisaasut arlaqartut Pinngortitaleriffik ilisimatitsivoq, soorlu unioqqutitsilluni piniartarnerit, unioqqutitsilluni mannissartarnerit, appat ineqarfiini eqqissiviilliortitsisarnerit aamma silap pissusiata allanngoriartornerata ukiuunerani timmiaqarfinnut aamma nerisassaqarniarnerannut uumaniarnerannullu sunniutigisinnaasaannut tunngassutillit.
Pinngortitaleriffimmiut piniartut isumaqatigaat oqartarmata Nunatta sineriaa suli apparpassuaqartoq. Eqqaamaqquaalli ukiuunerani pisarineqartartut ilarpassui nunanit allaneersuummata, taakkulu aamma ikiliartorfiusuneersuummata.
Uumassusilerisut inerniliillutik oqaatigaat, appat Nunatsinni piaqqisartut amiakkuulersut atugarliormata aamma kinguaassavut appanik ilangiisassappata piffissaagallartillugu iliuuseqarnissaq pisariaqartoq.
Piniarneq pisarisakkallu amerlassusiat taakkutuaapput maanna aqunniarsinnaasavut. Taamaattumik appat eqqissisimatitaalluinnarallarnissaannik Pinngortitaleriffik innersuussivoq. Taamaaliortoqarsinnaanngippallu piniagaanerisa malunnaatilimmik sivikillineqartariaqarnerat oqaatigineqarpoq, tassa taamaallaat qaammammi ataatsimi oktobarimi novembarimiluunniit piniarneqarsinnaanissaat innersuussutigineqarluni.
