Appasinnerusumik akissarsiaqartinneqassapput suliumajunnaaqqusaanaviarnatillu

Uagut akissarsiarisartakkatsinniit appasinnerusumik akissarsiaqartinneqassapput, suliumajunnaarsinnaatitaassanatik, uagullu sulinngiffeqarnermut tunngasunik inatsisivut atuutsinneqassanatik.

Tassa London Mining-ip Alcoa-llu siunniussimasaat pilersinneqassappata sulisut tuusintilikkaat avataanit tikisinneqarlutik atorneqartussat atugassariligassaat.

Inatsisissatut siunnersuummi qaammatip tulliani inatsisartuni siullermeerutaasumik eqqartorneqartussami massakkutut iluseqartillugit pissutsit taamaalernissaat ersarilluinnarpoq.

Sulisummi akissarsialuttut atorneqassanngippata suliffeqarfissuit nunatsinniit qimagunnissartik siorasaarutigisimagaat Naalakkersuisutta qularinnginnerarpaat, imammi inatsisissamut siunnersuummut tunngavilersuimmata, issuaaneq aallartippoq."Suliffeqarfissuarnut atugassarititaasut nunanut allani atugassarititaasunut unammillersinnaasariaqarput, nunammi unammilligassavut uagutsinnit akissarsialunnerujussuupput, sulisunullu aningaasartuutigisartagaat uagutsinniit appasinnerullutik". issuaaneq naavoq.

Aammali sulisut akissarsiatigut atugassarititatigullu ajunngitsumik tunngavilersorneqarluarsimasumillu atugassaqartinneqarnissaat qulakkeerneqarsimassasoq Naalakkersuisut ilanngullugu allaaseraat. Tamakkuli qanoq isinerani qulakkeerneqassanersut inatsisissami iluamik takuneqarsinnaanngillat.

Unali qularisassaanngilaq: Akissarsiat annertussusissaat maani nunatsinni atuutsinneqartut sulisussanut atuutsinneqassanngillat.

Sulilersussammi akissarsiassaanut tunngasunik isumaqatigiissuteqassagunik tamakkiisumik isumaqatiissusiorneqassapput, nunagisaminnilu isumaqatigiissutit atuuttut maani atugarissagaat inatsisissami allassimalluni, tassa isumaqatigiissusiornissaat pisariaqartinneqassappat atsaat tamanna pisinnaassaaq.

Naalakkersuisummi ilimagisaat naapertorlugu sulisorineqartussat nunatsinni akissarsiat minnerpaaffigisassaanniit appasinnerulaassasoq ilimagigaat inatsisissami atuarneqarsinnaavoq.

Aamma nunat allamiut sulilertussat Nunatsinniitillutik suliumajunaarsinnaassanngitsut inatsisissamut siunnersuummi allassimavoq. Naalakkersuisummi inatsissatut siunnersuutaanni ima allasimasoqarpoq:

- Sulilersussanut isumaqatigiissusiassat malillugit nunat allamiut nunatsinni sulilertussat isumaqatigiissutaareersut pillugit saqitsaatilissagaluarpata inatsisinik unioqqutitsissapput.

Tassa immikkut isumaqatigiissiassatut inatsisissamut siunnersuut malillugu piiaaffimmik piginnittut Kina-miullu sulinermik inuutissarsiuteqartut kattuffii isumaqatigiissusiorneqassapput, tassalu nunatsinni sulinngiffeqarsinnaanermut inatsisit nunat allamiut sulilersussanut atuutsinneqassanatik.

Inatsisissatut siunnersuut oktobarip 18-iani siullermeerutaasumik inatsartuni eqqartorneqassaaq. Inatsisissatullu siunnersuut akuerineqassappat qallunaat inatsisartuisa - tassa folketingip - nunat allamiut pillugit inatsisaannut taputartuunneqartussaammat akuereqqaartariaqassavaat. Qallunaammi nunat allamiunut inatsisaat Danmarkip ataani akisussaaffigineqarmata.