A.P.Møller-Mærskikkut siullermeerlutik amigartoorput
Ukiup affaanut naatsorsuutini 3 milliardit koruunit sinnerlugit amigartooruteqarneq ingerlalluarnertut oqaatigineqarsinnaanngikkaluarpoq. Aammami A.P. Møller-Mærskip pisortaanerata Niels Smedegaard Andersenip tamanna ajuusaarutigaa, tamatumali peqatigisaanik isumalluarpoq:
- Aningaasartuutikillisassaagut, sullitatta naammagisimaarinninnissaat isumagissavarput, tunisassavut piffissaq eqqorlugu tunniuttarlugit, umiarsuillu piffissaq eqqorlugu aallarnissaat isumagissallugit. Suliffeqarfik ataatsimut isigalugu ingerlalluarpoq, Niels Smedegaard Andersen oqarpoq.
Isumalluarnissamullu pissutissaqartoq, Carsten Krogholtip, niuernermik ilinniarfissuarmi Copenhagen Business Schoolimi naatsorsuuserinermut kukkunersiuinermullu institutimi pisortaasup oqaatigaa. Taassumalu maluginiarpaa naatsorsuutit uuliap akiata appariarujussuarsimaneranit sunnerneqarsimanerat.
- Uuliap akia qaffariassagaluarpat Mærskip naatsorsuutai ukiup naaneranut amigartoorfiunatillu sinneqartoorfiussanngillat. Aamma naak umiarsuit containerinik assartuisut milliardilikkaanik amigartoorfiussagaluarpataluunniit, Carsten Krogholt oqarpoq.
Taanna aperineqarami Mærskip siunissaa qanoq innersoq akivoq, unammillersinnaanermut piukkunnarsartoqartoq, Mærskillu containerinik assartuineq kisiat ingerlatarinnginnamiuk tamanna nakooqutigigaa. Ilaatigut assartugalerineq aamma uuliasiorneq isumalluutaasussaanerarpai, naak uuliap akiisa allanngorarnerat sunniuteqartussaagaluaqisoq, taamaattumik siunissaq isumalluarnartoqarpoq, Carsten Krogholt oqarpoq.
