APK: Canadamiut akillugit mattunneqarniarlit
Aalisariutit nunatsinneersut Savalimmiuneersullu Canadami umiarsualivinnut kingumut taleqqusaajunnaarput.
Aalisartortatsinnik mattussineq raajartassat pillugit isumaqatigiinngissuteqarnermik pissuteqarpoq. Paggivittap (New Foundlandip)avataani, imartami nunat tamalaat aalisarfigisinnaasaani, Danmarkip naalagaaffiata aalisartui, matumani kalaallit savalimmiormiullu, raajanik 140 toninik pisaqarsinnaatitaapput. Pisassalli amigarineqartuarsimapput.
Sapaatip-akunnerata matuma aallartinnerani Canadami oqartussanit oqaatigineqarpoq kalaallit savalimmiormiullu pisassatik sinnerlugit aalisalersimasut, taamaattumillu umiarsualivinnut mattunneqassasut aalajangerneqarluni.
Pissutsit taamaaleqqinnerat APK-mi pisortap Peder Munk Pedersenip Davisstrædimi pissutsinut assersuuppaa. Tamaani canadamiut raajarniarput, raajanillu qaqittagaat nunatsinni aalisartunit amerlagineqartarput.
- Pissutsit taakku marluk imminnut assigiittorujussuupput. Kalaallit Nunaanniit qisuariaatissaq naleqqunnerpaaq tassaasariaqarpoq canadamiut oqarfigissallugit: Ajunngilaq, nunatsinni umiarsualivinnut taleqqusaajunnaarpusi. Raajatassanit ataatsimoorussatsinnit pisarisartakkasi ingasapallaaqaat, Peder Munk Pedersen oqarpoq.
