Apersortittooriarneq tillinniamit akornuserneqartoq

(Nutartigaq 13:50)

Angutip Akunnaameersup Qasigiannguani ilaquttaminut apersortittuliartup umiatsiaaqqani tammaavaa.

- Tillinniarneq ippassaq sapaammi nalunaaqutaq qulingiluat qeqqata aqqarnullu akornanni pisimavoq, taama Qasigiannguani politeeqarfiup ulluinnarni aqutsisua Karl Vinther oqarpoq.

- Nalunaaqutaq ulloqeqqalersoq tutsiupput umiatsiaaraq Qasigiannguani sissiukkap eqqaani pitoqqasoq nassaarineqarpoq.

Umiatsiaaraq tassaavoq Poca 500 1999-imeersoq Yamahamik 60 hestekraftimik motorilik. Motori ukiunik marluinnarnik pisoqaassuseqarpoq. Umiatsiamiippullu dunki 60 liiteri, baaliarsuaq qernertoq aallaallu.

- Atortui tamarmik iluaniipput, kisianni tassa atorneqarsimavoq. Angallatit aallararlutillu tikeraannavimmata paasiuminaassaaq kiap aallarukkaluarsimaneraa, Karl Vinther oqarpoq.

Angutip Akunnaameersup motorimi matuersaataa atatiinnarlugu qimassimavaa sissamiillu qummukarluni. Matuersaatip atatiinnarsimanera inuit ilannguata ussernartorsiorfigisimavaa umiatsiaararlu aallarullugu.

Politeeqarfiit qaninnerit Ilulissaniittoq Aasianniittorlu tillinniartoqarsimaneranik nassaarineqarneranik kalerrinneqareerput.

Umiatsiaaqqap kimit aallarunneqarsimagaluarneranik ilisimannittoqaruni Qasigiannguit politiivi sinerfigineqarsinnaapput 91 12 22-imut.