Apeqqutitik akineqaqquaat

Ernummateqarnertik imminnullu tunngassuteqartut partiinit angisuunit qanoq iliuuseqarfiginiarneqarnersut qineqqusaarnermilu suut qulequtarineqarnersut, Canadami inunnut paasissallugit pingaaruteqarluinnartoq, allakkaminni ersersippaat.

Inuit Tapirit Kanatami aqqanilinnik apeqquteqarput. Ilaatigut partiinut apeqqutigineqarpoq tuberkuluusi tuniluuttoq qanoq iliuuseqarfiginiarneraat, Canadap issittortaani inuit pisinnaatitaaffii suunersut, naalakkersunngussagunik avatangiisinut periusissamik qanoq ilusiliiniarnersut kiisalu apeqqutit nunarsuarmioqataanermut tunngassuteqartut, soorlu FN-ip nunap inoqqaavisa inuttut pisinnaatitaaffiii pillugit nalunaarutaa qaqugu qanorlu partiiniit atuutsilersinniarneqarnersoq.

Kingullermik qineqqusaartoqarmat inuit kattuffiat partiinut aamma apeqquteqarpoq.Tamanikkut partiit pisortaallu tamarmik akissuteqarput. Maannakkut aamma taamaliornissaat naatsorsuutigineqarpoq. Akissutigineqartut Inuit Tapirit Kanatami-p nittartagaanut it.ca.-mut ilineqassapput.

Qinersineq maajip aappaani pissaaq.