Apeqqutit akissutissaqartinngisat arlaqarput
Radioaviisip Københavnip kommunea maanna attaveqarfigaa, tassanngaanniillu pisut tulleriiaarlugit ima oqaluttuarai.
Siverth Petersen majip ulluisa qulingani toqummat, toqunera pillugu ilaqutai qaninnerit Nunatsinniittut politiinit kalerrinneqarput.
Kisianni Københavnip kommuniata ilisisarnermut allaffianeersoq Michael Bruhns napertorlugu Siverth Petersenip ilisaanissaanut suliassat pisariaqartinneqartut isumagineqarnissannut akissaasoqarusuttoqarsimanngilaq. Taamatut oqarneq ilaqutaasut radioaviisimut ippassaq oqaluttuaannut naapertuutinngilaq.
Danmarkimi kalaallit palasiat Jens Kristian Kleist radioaviisimut ullumi oqarpoq, ilaqutaasut kissaataat tungavigalugu ulloq maajip 30-at eqqaaniaalluni naalagiartitsisimalluni, taamaattumillu issumeerinninnermik iliuuseqarsimanani, Siivaleeraq Nuummi ilisaasussammaat.
Kisianni taama pisoqanngilaq. Tassami Københavnimi politiit ilisaanissaanut isumaginnittussanik nassaarsinnanngimmata, Michael Brunhs maajip 16-ani politiinit attavigineqarpoq, Siivaleeqqap ilisaanissaa isumagissagaa.
"Tamatuma kingorna inuit normuisa allattorsimaffiannut ilaqutaanut tungassuteqartut pivagut. Aamma aniingaserivik, Siivaleeqqamik sullissisoq, attavigineqarpoq. Tamatuma kingorna Vestebromi ilisinernik isumaginnittartut, Begravelse Danmark, Siivaleeqqap ilisaanissaa pillugu attavigineqarput.
Taava aamma palasi Jens-Kristian Kleist ilisinermi peqaataaqqullugu kommuunemit attavigineqarpoq". Siivaleeqqap ilisaanissaata tungaanut pisut pillugit Michael Bruhns radioaviisimut taamatut allappoq.
Ilisinissaq oqaluffimmi Vor Frelsers Kirkemi ataasinngornermi maajip 30-iani pisussatut aalajangerneqarpoq.
Danmarkimi illerfissarsioqatigiit, Begravelse Danmark, Siivaleeraq Petersenip arsaasa Vestre Kirkegårdimi ilineqarnissaanut Namminersorlutik Oqartussant qinnuteqarpoq, qinnuteqaataalu akuerineqarluni.
Ilisinissami piffissaq ullualu aalajangerneqarput, tamanna pillugu ilisarisimalluagaa Andrea Josefsen, qatanngutaalu kinaaneranik ilisimaneqanngitsoq ilisimatinneqarput.
Michael Bruhns allappoq, Københavnip kommuuniata ilisimasimanngikkaa, arsat Nunatsinnut nassiunneqartussaasut, kommuunip allaffia nalunaarsimanngimmat.
Taassuma ilanngullugu eqqaavaa, toqusut arsaasa Nunatsinnut nassiunneqarlutik ilineqarnissaat ilaqutaasut kissaatigigaangassuk, Københavnip Kommuniata oqaluffiup ilisiffiusussap atia sumiiffialu paasiniartaraa, toqusup arsai nassiunneqassammata ilineqarlutillu.
