Apeqquteqartarfik ingerlalluarpoq

Naalakkersuinermut tunngasunik internetimi sapaatip akunnerani matumani apeqquteqartarfitsinni Palle Christiansen apeqquteqarfigineqarsinnaavoq. Apeqquteqarusuttut imaaginnavipput. Inatsisartunut ilaasortaq assigiinngitsorpassuarnut tunngasunik apeqquteqarfigineqartarpoq. Ilaatigut ilinniartitsisussaaleqinermut tunngasut, mittarfissuaqarnermut, nammineerluni illuliortarnermut, sullivinnik aallarniisarnermut, politikerit pissusilersortarnerannut aamma kalaallit erfalasuannut tunngasunik apeqquteqarfigineqarpoq.

Palle Christiansenip internetimi akissutai arlalitsigut naalakkersuinikkut nutaarsiassartaqarput. Ilaatigut saqqummiuppaa, Demokraatit Nunatsinni nunaateqarneq pillugu oqallissaarummik suliaqaleruttormata. Tamatumunnga atatillugu oqaatigaa, sullivinnik pilersitsisarnerup nunatsinni aningaasaliiffigineqarnissaa pisariaqartinneqartoq.

- Sullivinnik pilersitsisarnerup annerusumik sammineqartariaqarnera qularutissaanngilaq, taamaalilluni amerlanerusut namminersortutut inuussutissarsiummik misileerusussuseqalerniassammata, Palle Christiansen apeqquteqartarfimmi knr.gl-imi ilaatigut allappoq.

Ilinniartitsisut meeqqerivinilu perorsaasut amigaataanerat pillugu Palle Christiansen isumaqarpoq, atorfiit taakkua amerlanerusunut pilerinarsarneqartariaqartut. Aningaasarsianik naleqqussaanissaq ilaatigut siunnersuutigaa.

- Tamanna pissaaq suliamut naleqquttumik akissarsiaqartitsinikkut, kiisalu atorfimmi ilinniaqqinnissamut periarfissaqartitsinikkut.

Atorfiup isigineqarnera pitsaanerulertariaqarpoq, taamaalilluta suliffiup kikkunnit tamanit suliffigineqarsinnaaneranik isiginninneq pinngitsoorsinnaavarput, Palle Christiansen allappoq.

Taakkua saniatigut Palle Christiansenip neriorsuutigaa, ineqarnermut oqaaseqartartutut, illoqarfiit annerit avataanni inissianik illunillu pisinissamut aningaasanik atorniarnissamut periarfissat misissorniarlugit:

- Illoqarfinnut illuliornermut atatillugu aningaasanik attartortitsivigineqarsinnaanngitsunut aaqqiissuteqartoqarnissaa pissusissamisuuginnarpoq. Qasigiannguit assersuutissaalluarput, tassami illut inoqanngitsut amerlapput, taakkualu tunineqarsinnaanerat pilerinartunngortinneqarsinnaavoq, allaat immaqa nammineerluni illulianit akikinnerusunngorlugit. Qanorpiaq aaqqiisoqassanersoq massakkorpiaq akisinnaanngilara, kisianni Demokraatini ineqarnermut tunngasunut oqaaseqartartutut pineqartup naammassineqarnissaa tikillugu malersorusuppara, Palle Christiansen allappoq.

Palle Christiansenip akissutai www.knr.gl-imi ullumi ullup ilaani atuarneqarsinnaalissapput. Politikeri alla apeqqutinut akissuteqarnissaminut piareeqqavoq. Kuupik Kleist, IA-meersoq, sapaatip akunnerani matumani apeqquteqarfigineqarsinnaavoq.