Apeqqarissaarnissaq KNR-imi ulapputigaat
Qinersinissamut toqqaannartumik apeqqarissaarnerit unnugu nal. Qulingiluanut tanneq pingasuniit aallartiinnaleqaat. KNR-imi piareersartut alakkarpavut.
KNR-imi studie-p iluani ataqatigiissaarisoq Aviaaja Rosing aperaarput, unnugumut piareersarnerminni suna ulapputigitigineraat.
- Ulapputigaarput studiep ilusissaa, nerrivilersuivugut aammalu grafikkit aaqqissuuppagut soorlu atit fjernsynikkut nuisussat grafikkitai iluarsaallutigit.
Apereqqipparput, sapaatip-akunnera tamaat ulapissamaarnersut.
- Apeqqarissaarnerit ullumikkumiit aallartittussaapput, toqqaannassatilluni ulloq siulleq ulapinnartorujussuusarami, naatsorsuutigaarput arfininngorneq ilanngullugu studiami ulapputissalluta, Aviaaja Rosing taama oqarpoq.
Taamatuttaaq teknikkikkut nakkutilliivimmi tusagassiortoq ataqatigiissaarisussaq Johanne Petrussen naammattoorparput, aperaarpullu sunarpiaq suliarissamaarneraa.
- Aallakaatitat ukua toqqaannartussaagamik, toqqaannarnerini uanga maani iluatungaaniit suliassaraara tusagassiortut pilersaarutertik malillugu apeqqutissatik apeqqutigineraat, imaluunniit apeqqutinik malersortariaqartunik tusagaqaruma qinnuigilaassallugit qanoq oqarnera maluginiassagaat, Johanne Petrussen oqarpoq.
Taamatuttaaq apeqqarissaartussaq Emma Kristensen aperaarput, apeqqarissaartussanngornermi piareersarluarsimaneq qanoq pingaaruteqartiginersoq.
- Piareersarluarsimanissaq pingaaruteqartorujussuuvoq, tassami innuttaasut sinnerlugit tusagassiortutut taakku apeqqutigisinnaasaat sapinngisamik tamakkerniarsarisussaat neriuutigalugu suliagut piareersartussaavagut. Qinersineq innuttaasuni ataatsimeersuarnertullusooq ippoq, taamaattumik innuttaasut sinnerlugit kikkut qinerumaarneraat apersuinerput aqqutigalugu ikiortussaavagut, krydsiligassartik eqqortumik inissinniassammassuk, tassa taanna uagut pisussaaffittut isigisarparput, Emma Kristensen oqarpoq.
