Apeqqarissaarnermi akissuteqartoqarpianngilaq

Apeqqarissaartoqarmat Atassummiit Partiit Inunniillu takkuttoqanngilaq, soorlu aamma Siumup ilaasortaatitaani ikittuinnaat takkunnissartik pisariaqartissimagaat.

Taamaakkaluartoq Inuit Ataqatigiit aamma Demokraatit apeqqarissaanermi uranimut naaggarluinnarnerup atorunnaarsinneqarnissaanut apeqquteqartuupput.

Apeqquteqartaraluarlutik akissutissat sukumiinerusut pissarsiarinngilaat. Tamannalu Naaja Nathaliensennip arajutsisimanngilaa.

- Apeqqarissaarfiuvoq, taamattumik akissuteqarfigineqarnissaq naatsorsuutigisariaqarparput, Naaja Nathaliensen ilaatigut oqarpoq.

Demokraatit siulittaasuata Jens B. Frederiksenip Naalakkersuisoq piumaffigaa akissuteqaqqullugu uranimut naaggaarluinnarnerup atorunnaarsinneqarnissaa Inatsisartunut malunniutaajumaarnersoq.

- Uranimut naaggaarluinnarneq atorunnaarsinneqassappat taava kingorna Inatsisartut toqqaannartumik aalajangiisinnaajunnaassapput. Taamaattoq pisinnaatitaaffik Naalakkersuisunut tunniunneqartussaavoq, aatsitassanut inatsimmi piumasaqaatit naammassineqarsimappata taava Naalakkersuisut taamaalinikkut namminneq aalajangersinnaavaat akuersissummik tunisisoqassanersoq. Taava ima paasineqassava Naalakkersuisut Inatsisartut apereqqaartussaanngikkai. Tamanna ilumoorpa? Jens B. Frederiksen aperivoq.

Aatsitassaqarnermut Naalakkersuisoq Jens-Erik Kirkegaard tamanna pillugu erseqqissumik akissuteqanngilaq.

Pineqartorli ersarippoq. Uranimut naaggaarluinnarnerup atorunnaarsinneqarnissaa tunngaviusumik isummerneruvoq, Inatsisartullu tamanna pillugu taamaallaat aalajangiisussaapput. Naalakkersuisut piginnaasaat taava apeqqutaalissaaq.

Naaja Nathanielsenip Inuit Ataqatigiinneersup aamma tupigusuutigaa Jens-Erik Kirkegaard isumaqarsinnaammat uranimut naaggaarluinnarnermik atorunnaarsitsineq aamma Kuannersuarnut pilersaarut imminnut attuumannginnerarmagit. Taamaanneraatigalugulu Narsamiinnaq innuttaasunik taasititsisoqassasoq oqalulluni.

Naalakkersuisup tassani akissutigaa aatsitassarsiorfimmi allamik pilersitsisoqalinngitsoq.