A.P. Møller Fonden sermersuarmi qilleraluni ilisimatusarnissamut 25 mio. kr.-inik aningaasaliisoq
Tunup avannaani sermersuaq sukkasuumik ingerlaartoq 2,5 kilometerinik ititigisumik qilleriffigineqarniarpoq sermersuup qanoq qanorlu sukkatigisumik ingerlaarnera pillugu ilisimasanik nutaanik pissarsiffiginiarlugu.
Ilisimasat nutaat imavissuit siunissami qanoq annertutigisumik qaffakkiartornissaannik missingersuinissamut atorniarneqartut, instituttip nittartagaani taama allaaserineqarpoq.
Qillerineq Tunup avannaarsuani sermersuup ingerlaarfigisaani pissaaq - sumiiffimmi tassani sermersuaq ukiumut meterinik 60-inik ingerlaartarpoq.
- Sermersuup sermitaata qanoq ingerlaartarnera pillugu ilisimasat annikitsuinnaapput, taamaammat sermersuup ingerlaarnerata Kalaallit Nunaata sermersuata milliartorneranut qanoq sunniuteqarnerata ilisimasarfiginerulernissaa suliniummi siunertaavoq, professori Sermerlu Silallu pissusia pillugit misissuisoqarfimmi pisortaq, Dorthe Dahl-Jensen, taama oqaluttuarpoq.
Suliniutit allanit allaanerussuteqartoq
Misissuisoqarfik siornatigut arfineq-marloriarluni sermersuarmi qilleraluni misissuinernik ingerlatsisimavoq, taakkulu tamarmik qanga silap pissuserisimasaa pillugu ilisimasanik nutaanik pissarsiffigineqarsimapput.
Suliniulli nutaaq siornatigut qillerinernut allaanerussuteqangaatsiarpoq:
- Sermeq sukkasuumik ingerlaartoq siullerpaamik qilleriffigineqartussaavoq, taamaammat qillerinissaq piuminaassinnaassaaq, ukiunimi pingasuni qillerisoqarnerani sumiiffik qilleriffiusoq meterinik 80-inik nuukkiartussammat, Dorthe Dahl-Jensen taama oqaluttuarpoq.
Suliniut ukiormanna aallartinneqassaaq 2020-milu naammassineqassangatinneqarluni. Suliniut, danskit saniatigut, aamma USA-mit, Japanimit, Tysklandimit, Frankrigimit Schweitzimillu peqataaffigineqassaaq.
