Anthon: Naalakkersuisut Pituffimmi eqqakkat pillugit qanoq iliuuseqartariaqarput

Pituffiup eqqaani Uummannami amerikamiut eqqagaasa 50 tonsiusut salinneqarlutik EU-mut nassiunneqarnissaat Kalaallit Nunanni Danmarkimilu naalakkersuisunit 2011-mi isumaqatigiissutigineqartoq nutaamik isumaqatigiinniutigineqarsinnaasoq, Inatsisartuni ilaasortaq, Anthon Frederiksen oqarpoq.
Allattoq Apollo Jeremiassen
apriilip 14-at 2015 14:31

 

2011-mi Avatangiisit pillugit Naalakkersuisuusoq, Anthon Frederiksen Nunarput sinnerlugu isumaqatigiissummik atsiortuuvoq. Atsioqatigiinnermilu tassani ilanngunneqarpoq, paasinarsissappat eqqakkat annertunerussasut tamanna kingumut isumaqatigiinniutigineqarsinnaassoq.

 

Inatsisartunulli 2013-imi qinersinermi Anthon Frederiksen qiningaanngilaq, taamaalillunilu Pituffimmi eqqakkat pillugit suliaq akisussaaffigiunnaarlugu.

 

2011 isumaqatigiissut allanngorlugu isumaqatigiinniutigineqarsinnaavoq

Inatsisartunut siorna novembarimi qinersisoqarmat, Partii Naleraq sinnerlugu Anthon Frederiksenip kingumut Inatsisartuni ilaasortaaqqilernermini paragraf 37 naapertorlugu apeqquteqaateqarnermini paasivaa, eqqakkanut suliaq naammassineqarluni qimanneqarsimasoq.

 

- Maannakkut Naalakkersuisuusup, Mala Kuko Høyip apeqquteqaatinnut akissuteqarnermi oqaatigaa, suliaq naammassineqarluni unitsinneqarsimasoq. Tamannalu assorujussuaq uanga eqqumiigaara. Aamma eqqumiigaara suliaq aallartimmalli suliamik malinnaatinneqartut ataatsimiititaliaq, kalaallinik danskinillu inuttaqartoq imminut atorunnaarsinneqarsimasoq.

 

Anthon Frederiksenip naqissuserpaa, 2011-mi atisoqatigiinnermi ilanngunneqarmat isumaqatigiissutaalluni, eqqakkat ilimagisamit annertunerussappata, tamanna nutaamik isumaqatigiinniutigineqassasoq.

 

- 2013-imi Naalakkersuisunngortut suliaq pillugu annertunerusumik qanoq iliuuseqarsimannginnerat pakatissutigaara. Tassami 2011-mi isumaqatigiinniarnermi danskillu isumaqatigiissutigaarput, paasisat nutaat saqqummissagaluarpata tamanna danskinut saqqummiunneqarluni nutaamik isumaqatigiinniutigineqassasoq.

 

Anthon Frederiksen oqarpoq naqissuserlugulu amerikamiut eqqagaat siullermik 50 tonsitut nalilerneqaqqaarsimasut maanna 3500 tonsitut nalilerneqarsimasut qanoq iliuuseqarfigineqarnissaat maanna naalakkersuisuusunit akiusussaaffigineqartariaqartut.

 

- Tassami paasisat nutaat aallaavigalugit maanna naalakkersuisuusut akisussaaffigaat tamanna qanoq iliuuseqarfigissallugu.

 

Partii Naleraq sinnerlugu Inatsisartuni ilaasortaq, Anthon Frederiksen taama oqarpoq.

 

2011-mi isumaqatigiissut malillugu danskit naalakkersuisui 40 millioner koruuninik saliinissamut immikkut ittumik aningaasaliipput.

Aamma atuaruk