Video takuuk: Anthon Geisler 100-liivoq - inuk naliitsoq
Nunatsinnili namminersorlutik inuussutissarsiuteqartut utoqqaanersaat, Anthon Geisler, ullumikkulli ullorsiornermini sulinngiffeqarpoq.
100-nik ukioqaraluarluni Ilulissani Illumiut Aqqutaani kioskiutiminik ualikkut marlunit unnukkut qulingiluat tungaanut ammatitsisisarpoq, ukiumullu ulluni ikitsuinnarni sulinngiffeqartarpoq ullumi sisamanngornermi 100-nik ukioqalerluni inuuissiorpoq.
Iffiortutut 1952-imi ilinniarsimasunngunnginnermini Maarmorilimmi aamma Ivittuuni kiisalu umiarsuarni igasutut sulisimavoq.
Danmarkimi iffiortutut ilinniareerluni Ilulissanut 1952-imi nuuppoq, tamatumalu kingorna 1960-kkunnit Ilulissani namminersortutut inuussutissarsiuteqarpoq. Siullermik maanna angerlarsimaffimmini kaffebariuteqarluni, kingornalu Illumiut Kioskimik 1970-kkunnit ingerlatsinermigut.
- Tassa ullormut pisiniartitsitserujoorlungalu iluarsagassat iluarsaallugillu sulisarpunga. Soorunami ullaap tungaani uanni sulisarpunga nerisassakkallu suliaralugit ullup qeqqarnissaanut, Anthon Geisler, kioskiutaani marlunngornermi naapikkatsinni oqaluttuarpoq.
Suliunnaarnissani aalajangiussimagaa
Kisianni sooruna Anthon Geisler allat utoqqalinersiaqalersinnaaleraangamik suliunnaartartut nammineq suli sulisoq?
- Uanga meeraaninniit sulerusunneq nuannarisuugakku - sulineq - nuannarisuugakku. Taava aamma eqqarsaatigisarakku 100-t sulillunga angorusullugit, Anthon Geisler qungujuutigaluni nassuiaavoq.
Taamaakkaluartorli aamma nassuerutigaa 100-leereeruni suliunnaarnissani eqqarsaatigisimallugu.
- Tassa 100-liiguma eqqarsaatigaara suliunnaarumaarlunga. Kisianni suli aalajanginngilara qaqagu. Qaqagorpiaq. Aamma uanga nammineq angerlarsimaffinni uannuinnaq ikiorama uatsinni attugassaaleqissannginnama, Anthon Geisler oqarpoq.
Anthon Geislerillu 100-liinera assigiinngitsunik pisoqarneratigut nalliussineqassaaq, ilaatigut Ilulissani kulturikkut illorsuarmi kaffillertoqarneratigut.
Tassani Avannaata Kommunia iluliarmiunut nalunaaqutaq ataatsinit arfineq-marluk tungaanut kaffillissaaq, unnukkullu aamma arfineq-pingasuniit kalattut qittatsitsisoqassalluni.
Uani Qanoruumi pingasunngornermi ilanngutassiarineqartoq takoqqissinnaavat, tassani Anthon Geisler kioskiutimini sulisoq naapipparput.
