Anthon Geislerip, februaarip 21-ani 1919-imi inunngortup, 101-inik ukioqalerluni inuuissiornini eqqissisimanerusumik nalliussiniarpaa.Assi: Kathrine Kruse / KNR

Anthon Geisler 101-inik ukioqalerpoq sulilu sulisarluni

Nunatsinni namminersortut utoqqaanersaat, Ilulissaneersoq Anthon Geisler, ullumikkut 101-inik ukioqalerpoq. Suliunnaarnissani pimoorullugu isumaliutersuutigisalersimavaa.

Siorna 100-nik ukioqalermat Ilulissani innuttaasunit tamanit persuarsiutigineqarpoq. Kommunimi kulturikkut illorsuarmi Sermermiuni innuttaasunut kaffillerpoq.

Aamma Inatsisartut siullittaasuanit, immikkut qaaqqusat najuuffigisaanni, Inatsisartut nersornaasiuttagaannik sølviusumik nersornaaserpaa.

Anthon Geislerip, februaarip 21-ani 1919-imi inunngortup, 101-inik ukioqalerluni inuuissiornini eqqissisimanerusumik nalliussiniarpaa.

Anthon Geisler 
- Anthon Geisler Qeqertarsuup nunaqarfigisimasaani Aamaruutissani februaarip 21-ani 1919-imi inunngorpoq.

- Iffiortutut 1952-imi ilinniarsimasunngunnginnermini Maarmorilimmi aamma Ivittuuni kiisalu umiarsuarni igasutut sulisimavoq.

- Danmarkimi iffiortutut ilinniareerluni Ilulissanut 1952-imi nuuppoq, tamatumalu kingorna 1960-kkunnit Ilulissani namminersortutut inuussutissarsiuteqarpoq.

- Siullermik maanna angerlarsimaffimmini kaffebariuteqarluni, kingornalu Illumiut Kioskimik 1970-kkunnit ingerlatsinermigut.

- Tassa sulinanga angerlarsimassaanga. Aamma pilersaaruteqanngilanga qaaqqusinangalu, qungujulalluni taama oqarpoq.

AAMMA ATUARUK Anthon Geisler 100-liivoq - inuk naliitsoq

Taassuma Ilulissani Illumiut Aqqutaani kioskiutini suli ingerlappaa. Tassunga ullut tamaasa suliartortarpoq ualikkut marluniit unnukkut qulingiluap tungaanut.

- Tassa suli ingerlaarpunga. Aammali siullermitut peqarunnaarlunga pisiniarfiga immersorpallaarunnaarnikuungakku. Aamma eqqarsaatigilerakku taamaatikkumaarlunga ungasissorsuunngitsukkut, 101-inik ukioqalertoq oqarpoq, nangillunilu:

AAMMA ATUARUK Uannut naleqqutinngikkaluarpoq

- Eqqarsaatigiuartaraluarpara qangali taamaatinnissara. Sulineralu kisianni nuannarigaluareqigakku, kisianni aamma taamannaannaq inuujunnannginnama. 200-it angujunnannginnakkit, illarluni taama oqarpoq.

Taamaammat arfininngorpat suliartornissani naatsorsuutigaa.

- Arfininngorpat suliartornissara naatsorsuutigisinnaavara. Soorunami ajunngikkuma takussuara, Anthon Geisler oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat