Anthon Frederiksen: Susassaqartut suleqatigiinnerisigut aaqqiisoqassaaq

Nunami namminermi pissutsinut naalakkersuisunngorlaap Anthon Frederiksenip ajornartorsiut eqqumaffigaa, suliniuteqartoqartorlu oqaatigalugu.

Inunnik sullissisut kommunineersut ilinniarsimannginnerat ilaatigut pissutaalluni Isumaginninnermi Maalaaruteqartarfimmi suliassat amerliartuinnarput. Maalaaruteqartarfimmeersut KANUKOKA-meersullu taama oqarput, sullissisullu pitsaanerusumik ilitsersorneqarlutillu pikkorissartinneqartarnissaat ujartorlugu. Maalaaruteqartarfimmi suliassat aalajangiiffigineqarnissaminnut utaqqisut 600-t missaanniipput, ilaatigullu ukiuni marlunni utaqqisinneqarsinnaasarlutik.

Nunami namminermi pissutsinut naalakkersuisunngorlaap Anthon Frederiksenip ajornartorsiut eqqumaffigaa, suliniuteqartoqartorlu oqaatigalugu:

- Susassaqartut assigiinngitsut peqataatinneqarnissaat apeqqutaasorujussuussaaq. Isumaginnittoqarfiup iluani pisortaqafik minnerunngitsumillu KANUKOKA kommunillu ataasiakkaat. Suliassat pillugit paaseqatigiinnissaat pingaaruteqarpoq, Anthon Frederiksen oqarpoq.

Kommunini sullissisut ilaatigut ilinniarluarsimasuuneq ajorput, sullissinermullu tamanna kalluaasarmat ilinniartitaanikkut iliuuseqartoqartariaqarnera anigorneqarsinnaanngitsoq Anthon Frederiksenip oqaatigaa:

- Tamanna qangali ilisimaneqarpoq, aamma inulerinermut tunngasunik sullissisut ilinniarluarsimasut kommunini assigiinngitsuni amigaatigineqarput, ilinniartitaanerullu qaffassarneqarneratigut tamanna aaqqiiviginiarneqartariaqarluni, Nunami namminermi pissutsinut naalakkersuisoq Anthon Frederiksen oqarpoq.

Ajornartorsiutip qaangerniarneqarnerani inatsisitigut naleqqussaasoqartariaqarsinnaanera taassuma aamma tikkuarpaa.