Anthon Frederiksen: Suliffissanik piiaaffigineqarnissamut akissaqanngilagut

-Illoqarfik avannaani inuussutissarsiornikkut, aalisarnikkut, takornariaqarnikkut, angallannikkut sutigullu tamatigut inerititaqarfiulluartoq suliffissanik piiaaffigineqarnissaminut akissaqanngilaq, taama Ilulissani borgmesteri Anthon Frederiksen, Borgmesterip tullersortaata Bendt B. Kristiansenip Ilulissani raajaleriffiup Aasiannut nuunneqarnissaanik siunnersuutaanut akissuteqarpoq.

Aasiaat suliffissaaleqiffiupput Ilulissallu sulisussaaleqiffiullutik.

- Tusaqqusaarneq kisiat pinnagu, inuiaqatigiinnut tamanut pitsaasumik kinguneqartussanik suliniarta, Anthon Frederiksen kaammattuivoq.

- Avannaani raajarniat amerlanerpaat Ilulissaneersuupput, taakkulu soorunami illoqarfigisaminnut tunioraajuarnissaat pissusissamisoorluinnarpoq aamma Ilulissani raajalerisut, sulisut pikkorissut, sungiussilluarsimasullu suliaminnik arsaarneqartariaqanngillat, nangippoq.

Oqarluni Ilulissat illoqarfiat ima ukiuni kingullerni ineriartortitsiviutigisimasoq, allaat suliffeqarfinni assigiinngitsuni sulisinnaasut amigaataalersimallutik aamma aalisakkanik suliffissuarmi.

Naggataagulli nassuerutigaa suliassarpassuit suliffissarpassuillu inunnik sulerusuttunik orninneqarsinnaasut periarfissaagaluartut, inissaqarniarneq aporfiusoq. Taamaattumik Namminersornerullutik Oqartussat nuttarsinnaanermut aningaasaateqarfiat sulisussanut inissianik sanaartornermut ikiuuttariaqartoq oqaatigaa.

Qeqertarsuup tunuani tunisassiorneq pillugu, Qasigiannguit Kommuneat ullumi aggersaavoq, Aasianniit Ilulissaniillu kiisalu Royal Greenlandimit peqataaffigineqartumik Qeqertarsuup tunuani tunisassiornissamut periarfissat eqqartoqatigiissutigiumallugit.