Anthon Frederiksen suliassaqaqaaq

Ilulissani borgmesteri, inatsisartunut ilaasortaq, Kattusseqatigiinnilu siulittaasoq piffissaqarluarsimasutut imminut isigisimagunarluni suliffeqarfimmik peqalerpoq.

Ilulissani betoncentrali aallarteqqammerpoq. Annertunerpaamillu piginneqataasua nalinginnaasuunngilaq tassaagami Ilulissani borgmesteri Anthon Frederiksen.

KNR avannaani paasisagut malillugit piginneqataasup maluginiarsimavaa Ilulissani betoncentralemik amigaateqartoqartoq, aallartisarnialeramilu borgmesteri ornissamavaa aallartisarnissamut kommune tapiisinnaanersoq aperiartorluni.

Borgmesteri neqeroorsimavoq kommunemut tapiissutissanik piniartariaqanngitsoq namminerli inuttut piginneqataasinnaannginnerluni apeqqutigisimallugu.

KNR Avannaanit paasisagut malillugit Borgmester Anthon Frederiksen betoncentralemut 50%-mik piginneqataavoq. Piginneqataalu marluk tamarmik 25%-mik piginneqataallutik.

Ilulissani borgmesteri Anthon Frederiksen KNR Avannaaniit apersorusukkaluaratsigu oqarpoq privatimik inuunera susassarinnginnatsigu oqaloqatiginnikkumanani.

Borgmesterip piginneqateqarsinnanera aporfissaqanngilaq, kisiannili innuttaasoq, kommunimi tapiiffigineqarnissani anguniarlugu borgmesterimut orniguttoq qinnuteqaqqunngeriarlugu nammineq piginneqataaginnarsinnaasutut neqeroorneq, kommunimut sullissinermut salliussinerunngitsoq, Jens Lars Fleischer, Uummannami borgmesteri naliliivoq.

-Tassa soorunami inuiaqatigiit sinnerlugit qinikkatut sulisuunitsinni kommunerput sullittussaavarput, innuuttaasullu kiffartuunneqarneranut peqataasussaavugut. Soorunami kinaluunniit kommunimunut saaffiginninniarluni borgmesterimut saaffiginnippat, tassa uagut pisussaaffigaarput suna aqqut inuutissarsiornermut tunngasunik ingerlatsinissaanut aqqutissaasinnaasunik ilitsersuutissallugit. Nammineq inuttut soqutigisagut salliuttussaanngilagut, borgmesteritullu issianiarutta kommunerput sallerpaatittussaavarput.

Anthon Frederiksenip Ilulissani betoniliorfimmik peqalerneranut atatillugu ippassaq oqaloqatigineqartup paatsuunganartumik oqarnera tunngavigalugu oqaatigineqarpoq, aallartisaanissamut anngaasaliinissamut tunngatillugu borgmesteri orinissimallugu. Anthon Frederiksen KNR Avannaanut oqarpoq suliffimmi nalaani orninneqarsimanani, piginneqatigiinnissartilli pillugu nammineq inuttut oqaloqatigineqarsimalluni.

Betoniliorfimmik piginneqatigiligaa aallartisaaniarluni kommunemut qinnuteqarsimagaluartoq itigartitaasimasorli Anthon Frederiksen oqarpoq.