Anthon Frederiksen Kanukokamit iluarineqanngilaq
Kanukokap siulittaasua Enok Sandgreen oqarpoq aaqqissuussaanermik iluarsaaqqinneq kommuunit piareersimaffigigaat. Taanna oqarpoq Nunamut Namminermut Naalakkersuisoq, Anthon Frederiksen kommunit suliaannut ilisimasaqanngiltsoq.
Aaqqissuussaanermik iluarsaaqqinneq pillugu suliaq malillugu Innarluutilinnut tunngasut, nunaminertamik agguaassisarnerit paaqqinnittaarfiillu kommuuninit 2013-mi tiguneqartussaapput.
Ullumikkut Nunamut Namminermut Naalakakersuisoq Anthon Frederiksen, oqarpoq tamanna piviusunngorsinnaangitsoq, taamaattumillu piffissaliussaq killigitinneqartoq 2016-mut kinguartinneqartoq.
Tamatumunngali Kanukokap siulittaasua Enok Sandgreen isumaqataanngilaq.
- Isumaqarpunga pissusissamisuunngitsoq imatut paasissagaanni tigooraanissaq kinguartinneqartariaqartoq. Tassa tigooraanissaq ingerlaannartariaqarpoq. Oqareernittuut piaereersimavugut aammalu piareersareernikuuvangut sulisussat taakkualu utaqqiinnarput aningaasanik nuussissoqarnissaanut. Taamaattumik tigusinissaq tulleq imatut isumaqassappat 2016-mi pissasoq taanna akuersaarneqarsinnaanngilluinnarpoq, Enok Sandgreen oqarpoq.
Ualimut Anthon Frederiksen ima oqarpoq:
- Pilersaarusiornerlunnertut taarusunngilara, kisiannili kommuuninut suliarissallugu oqitsuinnaanngilaq. Ilaatigut tamakkua pissutaallutik isumaginninnermut tunngassuteqartut kommuunit 1. januar tigorusunnikuunngilaat, Anthon Frederiksen oqarpoq.
Enok Sandgreennilli nassuerutigaa ukiunik pingasunik ilasineq atorluarneqarumaartoq.
- Uagut kissaatiginerpaavarput Anthon Frederiksenip kommunit Kanukokalu suleqatigilluinnassagai, illuatungilersorata naalakkersuisuuffigimmatigut, taamaattumillu aamma paasisariaqarpaa killiffik qanoq ittuusoq, maannamummi saqqummertarnermini nalugaa takusinnaajuarparput, tassa illuatungilersuimmat Kanukokamut kommuunimullu, Enok Sandgreen oqarpoq.
