Anthon Frederiksen-ip Inatsisartuni tunuarnissi nalornilerpaa

Anton Frederiksen Qanoruumut ippassaq oqarpoq, Inatsisartuni ilaasortaanerminit tunuarluni Ilulissanili tamakkiisumik borgmesteriuniarluni, ullaap tungaali radioaviisimut oqarpoq, Inatsisartunit tunuarniarnini nalorninarsisoq, Siumukkut suleqatigiilernissamik piumasaqaatertik allanngortillugu Ilulissani borgmesteriutitaqalernissartik piumasarilermassuk.

Ilulissani Siumup siulittaasua kommunalbestyrelsimilu ilaasortaq Palle Jeremiassen oqarpoq, suleqatigiilernissamut piumasaqaatit allanngortinneqanngitsut:

-Piumasaqaatigut allanngortinngilavut, aallaqqaataanilli piumasaraarput Ilulissat ataavartumik borgmestereqarnissaat. Ippassaq ullaakkut Kattusseqatigiit ataatsimeeqatiginerini piumasaqatigut saqqummiuppavut, tassalu aamma Kattusseqatigiit suleqatigissagutsigit amerlanerussuteqaratta borgmesteriutitaqarnissaq tulluartutut isigalugu, Palle Jeremiassen oqarpoq.

Palle Jeremiassen aamma oqarpoq Anthon Frederiksen-ip viceborgmesterinngornissaa neqeroorutigisimallugu.

Palle Jeremiassen oqarpoq Kattusseqatigit Anton Frederiksen-ip borgmersteriuinnarnissa nalunaarutigimmassuk Inuit Ataqatigiinnik suleqateqarnissartik aalajangiussimallugu:

- Nalunaarfigineqaratta Anthon Frederiksen-i borgmesteriuinnarniartoq nalunaarutigaarpugut Inuit Ataqatigiit suleqatigiilernissaq siunertaralugu oqaloqatiginiarlugit.

Palle Jeremiassen aperineqarami Ilulissani Kattusseqatigiit ikinnerussuteqarlutik borgmestereqartitsissappata politikkikkut suliniarneq qanoq ingerlassanersoq, akivoq:

- Inuit Ataqatigiillu isumaqatigiissinnaagutta, taava uagut Anthon Frederiksen suliakkersussavarput, taassumalu inatsisit malillugit suliakkersuutivut isumannaarniartussassavai, Paller Jeremiassen oqarpoq.

Naggataagut Palle Jeremiassen ulluni kingullerni pisut ima nalilerpai:

- Uagut aallaqqaataanilli aalajangiusimasavut aalajangiusimavavut, Anthon Frederiksen-iuna nikerartoq aalajangiussani allanngortitseqattaarnermigut. Politikkikkut taama pinnguatoqarsinnaangilaq, Palle Jeremiassen oqarpoq.

Ilulissani Inuit Ataqatigiit sinnerlugit kommunalbestyrelsimi ilaasortaq Bendt B. Kristiansen oqarpoq, Anthon Frederiksen-ip ulluni kingullerni iliuusai politikkikkut kusanaatsuliornerusut akuerineqarsinnaangitsullu.