Anthon Frederiksen inatsisartuniinngilaq

marsip 10-at 2006 12:13

Kattusseqatigiit Partiiat sinnerlugu Inatsisartunut ilaasortaq Anthon Frederiksen Inatsisartut ukiuunerani ataatsimiinneranni februaarip 24-ianiit ataatsimiinnerup sinnera sulinngiffeqarluni peqataassanngilaq, naak inatsisartut ataatsimiinneranni Naalakkersuisunut apeqquteqaatit 25-it akornanni arfineq-pingasut apeqquteqaatigigaluarlugit.

Anthon Frederiksenip tunngavilersuutigaa kommunimini borgmesterisut suliassani paarisariaqaramigit Inatsisartut ataatsimiineranni peqataasinnaanani:

- Marsip aallartisimalernerani borgmesterit ataatsimiinnerannut peqataaniarlunga Inatsisartut ataatsimiinnerata sinnera sulinngiffeqarnissara qinnuteqaatigisimavara, aamma Ilulissani kommunalbestyrelsip atatsimiinnissaa piareersarniarlugu, Anthon Frederiksen oqarpoq.

Aperigatsinni Inatsisartuni sulinera pingaaruteqarpallaanginnersoq Anthon Frederiksen akivoq:

- Inatsisartuni sulineq pingaaruteqartorujussuuvoq, aammalu kommunini Inatsisartunilu sulineq imminnut ataqatigiisinnissai pingaaruteqarpoq

Anhon Frederiksen aamma oqarpoq sinniisussanilu Loritha Henriksen-ilu Inatsiartuni suliat pillugit atttaveqaqatigiilluarlutik:

- Attaveqaqatigiilluarpugut, aamma suliassat ataasiakkaat pillugit agguaasseqatigiinnikkut aaqqittarpagut, aaqqiisuussilluarnerlu atorneqarluni, Anthon Frederiksen oqarpoq. Naggataatigut oqarpoq Kattusseqatigiit Partiaanni imaanngitsoq kisimi aalajangiisusarluni, aammali siulersuisut aalajangeeqataasartut. Erseqqissarpaalu piffissap takutikkumaaraa ukioq manna Inatsisartut upernaakkut ukiaakkullu ataatsimiinnerini peqataassanerluni.