Anthon Frederiksen: Aningaasartai qulakkeertariaqarput

Meeqqat inuusuttuaqqallu angerlarsimaffiisa kommunenit 2009-mi tiguneqarnissaa isumaqatigigaluarlugu, aningaasaqarneq qulakkeerneqarsimassasoq, Ilulissani borgmesteri Anthon Frederiksen oqarpoq.

- Tamatut nutserinermi aningaasatigut sunniutigisinnaasaanut tunngasut aamma malinnaatinneqartariaqarmata, nalunnginnatsigu meeqqanut inuusuttunullu ulloq unnuarlu paaqqinnittarfiit eqqarsaatigalugit ullumikkut tamakkiisuuunngitsut, oqarpoq.

Anthon Frederiksen taama oqarnermigut eqqarsaatigai inissat ullumikkut amigartut. Akisussaaffiup kommuninut tunniutinninnerani naammassillugit suliarineqarsimanissaa pingaartorujussuartut isumaqarfigaa.

- Ulloq unnuarlu paaqqinnittarfinni inissiisarneq akisoorujussuuvoq, tassami døgnimut 1.000 koruunit angullugit akeqarpoq. Meeraq ataaseq ukioq ataaseq taamatut inissisimatissagaanni 400.000 koruunit ½ millioni koruunillu angullugit akeqarsinnaammat. Angalanerit, nerisaqartitsinerit allallu eqqarsaatigalugit, nangippoq.

Suliassat taamaattut imaannaanngitsut nalilersuiffigilluarnissaat pilersaarusiorluarnissaallu assorujussuaq Ilulissat kommuniata ulloq unnuarlu arlarlinnik angerlarsimaffeqartup pingaartippaa.

- Kommunit tigusinissaat tunngaviatigut isumaqatigaarput, assersuutigalugu marloqiusamik allaffissornerit pisortaqarfinnut apersuisaqattaarnerit allallu pisartut eqqarsaatigalugit; Ilulissani borgmesteri oqarpoq.

Sulianillu kinguarsaataasartut ilanngullugit qaangerneqartariaqarsoraat.

- Tikkuarparput eqqarsarnartoqartinneqarsinnaasoq, tassa aningaasaqarnikkut kingunerisassai ilanngullugit qulakkeerneqartariaqarneri, Anthon Frederiksen oqarpoq.

Ilaqutariinnermut Pisortaqarfiup aaqqissugaanik Pisortaqarfimmi sulisut, KANUKOKA-mit aallartitat sinerissamilu meeqqat inuusuttullu ulloq unnuarlu angerlarsimaffiini pisortat uani sapaatip-akunnerani aallarnisaataasumik ataatsimiipput. Ilaatigut siunertaavoq ulloq unnuarlu angerlarsimaffiit kommuninit tamakkiisumik akisussaaffigineqalernissaasa tungaanut suleqatigiissitalianik piareersaasussanik pilersitsinissaq.