Anthoinette Kristensen: Ullaariarsuaq utaqqisarpunga

Peqqinnissaqarfimmi sulisussaaleqineq peqqutigalugu Sanami suliaritinniarlutik utaqqisut amerligaluttuinnartut ippassaq ilanngutassiaraarput. Seeqqumikkut suliaritinniarlutik utaqqisut 201-iupput, taakku ukiut sisamat utaqqikkajullutik. Utaqqineq ulluinnarni inuunermut imaannaanngitsumik sunniuteqartartoq, Nuummeersup Anthoinette Kristiansen, misillerfigaa, ukiut aqqaneq marluk matuma siorna seeqqumigut ajoqusernermi kingorna suliaritinnissaminut utaqqigami.
decembarip 04-at 2008 17:13

Anthoinette Kristiansen ima oqaluttuassaqarpoq.

- Suliaritinnissannut aaversereerlunga uummatisiortereerlungalu suliaritinnissara kisiat utaqqiinnaleraluarpara. Taamanikkulli nakorsat aallarnerat peqqutiginerarpaat, suliaritinnissaralu kinguartilluni, nalunaartoqaqqinngisaannarporlu.

>Sooruna?<

-Uanga taannartaa paasisinnaanngilara. Taassuma saniatigut qasseriarlungamita nakorsiarpunga, oktobarip qaammataani qasseriaraluarnerpunga, taavalu septembarimi naakorsap neriorsorpaanga sianerniarluni ilisimatikkumallunga. Ullaariarsuaq utaqqisarpunga sianernissaanut, tutsiutissanatillu, Anthoinette Kristiansen oqarpoq.

Anthoinette Kristiansen ullaakkut unnukkullu eqaarsaaqqaarluni aatsaat pisussinnaalertarpoq. Suliaritinnissaminullu neriorsuutit eqquutsinneqannginnerat assut pakatsigai.

-Iluaqusersorlunga iluaqutigisarpara, kisianni sinilluarnanngeqaaq, kapukartut annernartut nungussinnaasannginnamik unnuami, aamma eqqarsaatit. Ilaannikkut sapileraangama rollator-inut/ qamutinut ajattartartakkanut ingillunga tagiartortarpunga, annialeraangama uffa massa pisunniarlunga. Aatsaallu kapukarneri qaangiukkaangata annernarunnaangata nikuittarlunga.

>Taamatut utaqqinerit qanoq ippa?<

-Nuanneeqaaq, peqqinnaranilu aamma taamatut neriorsorneqarluni. Uagut neriorsuisarpugut neriorsuilluta. Kisiannili taakkua neriorsuineri pakatsinaqaat, nuanninngillat. Eqqarsaatersuleraangamalu annerisannut tamarmik pisaramik, ajoraluartumik.

Taama oqarpoq seeqquminik suliartinniarluni utaqqisut ilaat Nuummeersoq, 69-nik ukiulik Anthoinette Kristiansen.