Anso Hardenberg Torinomi saqqummersitsilerpoq

Nerisassanik nuannarisallit neqinik nerisassanullu akugitinneqartartunik nunatsinneersunik ukiaru naliliissapput.

Igasoq Anso Hardenberg Torinomi nunat tamalaat nerisassanik oktobarimi saqqummersitsilerpata nunarput sinnerlugu saqqummersitsinissaminik qinnuigineqarsimavoq.

Italiami ukioq allortarlugu nerisassanik saqqummersitsisoqartarpoq. Saqqummersitsineq peqatigiiffimmit International Slow Foodimit aaqqissuunneqartarpoq. Neriniartarfiit amerliartuinnarnerat akiorniarlugillusooq peqatigiiffik Parisimi 80-kkut qiteqqunneranni pilersinneqarpoq. Ullumikkullu inunnik 80.000-t missaannik nunani assigiinngitsuni 100-t missaanniittuni ilaasortaqarluni.

Anso Hardenbergip ilaatigut ilisimaneqaatigaa, KNR TV-mi kalaaliminernik nerisassioriaatsinik nutaanik isiginnaagassiortarnini. Torinomilu saqqummersitsinermi peqataanissaminut peqataaqqusaasimagami akuerineqartutut misigisimavoq neqillu nunatsinneersut nunarsuarmi ilisimaneqarlualernissaat qularinngilaa. Umimmaap nikkua, kuannit nunattalu naasui assigiinngitsut panertitat takannaarutigineqarpata taava paasinarsissaaq nunatsinneersut nunarsuarmi ilisimaneqalernissaat ilumut eqquutissanersoq.