Anorersuaq Nuummut tikiuteqqissaaq

januaarip 26-at 2005 10:36

Anorersuartut sakkortutigisumik anoraasuartarlunilu siallernera Kitaata sineriaani najugalinnut nuannaarutaavallaanngilaq.

Silarlunnera USA-p nalaani aporaaffiit marluk aporaannerannik pissuteqartoq DMI-p Kangerlussuarmi immikkoortortaqarfianeersoq Birgitte Knudsen nassuiaavoq.

- USA-p avannamut kangisinnerusortaani silaannaq nillertoq Amerikap avannarpasinnerusortaaneersoq silaannarlu kissartoq isugutasorlu Atlanterhavimeersoq aporaaffeqarput. Tamanna naqitsiniisaffimmik annertuumik pilersitsivoq, tamannalu illoqarfissuarni New Yorkimi Washingtonimilu aperujussuarneranik kinguneqarpoq.

Naqitsiniisaffik pineqartoq maanna avannamut Davisstrædip tungaanut illuariartorpoq, taannalu silaannarmik kissartumik isugutasumillu nassataqarpoq. Taamaattumik nunatta sineriaata annersaani, Qeqertarsuup Tunua tikillugu, Tunullu sineriaani issisiut appangaatsiaqqavoq siallaerlunilu, sunalu tamarmik quatseqqalluni. Sila kiakkaluartoq nunap nillernerata nuna serminnguutsittaraa, Birgitte Knudsen nassuiaavoq.

Unnuakkut sisamanngornerup tallimanngornerullu akornanni naqitsiniisaffik alla, ullumikkutulli naqitsinertutiginngitsoq, Davisstrædip nalaani pinngussaaq. Taanna sialummik nittaallamillu nassataqassaaq. Naqitsiniisaffik Nuup nalaanut pippat anorersuartut sakkortutigisumik anorlilissaaq, sivikitsuinnarmilli.