Anorersuaq malliortitseqisoq
Nalunaaquttap taamaalinerani Asiap uuttuinera malillugu sekundtimut 15 meterinik anorlerpoq anoraasuaraangamilu 18-t tikittarlugit.
Nalunaaquttap akunneri marluk qaangiummata anorlileriartuinnarpoq nalunaaqutarlu pingasut missaanni sakkortunerpaaffimminiilerluni.
Akunnerit pingajuata qeqqa umiarsuaq assoralissimaareersorlu umiarsuup nalagaata, Michael Friis Rødel-ip, ilaasut ilisimatippai anorersuarsiuleraluarsimallutik sekundtimut 40 meterit tikittarlugit allaat taamalu anorlertiginissaa Qallunaat Nunaanni silasiorfiup, DMI-p, ilimasaarutigisimanngikkaa.
Anorersuaq sooq DMI-miit ilimasaarutigineqarsimannginnersoq paasiniarlugu Kalaallit Nunaani silap qanoq innissaanik DMI-mi immikkortup pisortaanut, Knud Jakob Simonsenimut apeqqutigineqarmat oqarpoq, decemberip 15–iani, Kalaallit Nunaata kujasinnerusortaata kitaani sineriak atuarlugu sakkortuumik anorlertitsisumik naqitsiniisaffeqarsimasoq, kisianni taamaallaat anorip sekundtimut 26 meterit tikittarsimagaa.-Tamaakkaluartoq sumiiffinni ataasiakkaani sakkortunerusimasinnaanera ilumuunnginnerarusunngilara, Knud Jakob Simonsen oqarpoq nangillunilu:
-Uagut uuttuutitta taama anorlertigisimanera takussutissaqartinngilaat, taamaattumik umiarsuup nalagaata taama oqarsimaguni tamanna nammineq akisussaaffigissavaa.
Tamatumunnga atatillugu Sarfaq Ittuup naagalaa Michael Friis Rødel oqarpoq, nammineq oqaatsini akisussaaffigissallugit ajorinngilluinnarlugu, angalatillutik anorip sukkassusianik uuttuutertik malillugu anorlernerpaagami allaat sekundtimut 40 meterit qaangerlugit uttuisarsimammat, tassa 41-t ilaannilu 42 –t tikittarsimammagit, taamalu anorlertuaannarsimavoq nalunaaquttap akunnera sinnerlugu.
Michael Friis Rødel aamma oqarpoq, anorlernerpaagami 40-t tikittarsimagaat Asiap uppernarsarsimagaa takussutissaqartillugulu, Maniitsumi Nuummilu sekundimut 39,5 meterit tikillugit ulloq taanna anorlersimammat.
Asiami silaannaap pissusaanik misissuinermi suleqataasup, Per Hangaardip uppernarsarpaa, uuttortaanertik naapertorlugu anoraasuartarnerit sekundtimut 40 meterit tikittarsimagaat, kisianni aamma maluginiarsimanerarpaa, norskit tyskillu silarsiorfiisa marluk taama anorlertiginissaa ilimasaarutigisimanngikkaat.
