Annilaaqqapput
Qaasuitsup killeqarfiata avannaani annilaartitaasimasunik ikiueqqaarsinnaasumik tarnip pissusiinik ilisimatooqanngilaq, taamaattumik nakorsaq politiit palasilu ikioqatigiillutik eqqorneqartunik ippassarli ikiueqqaarput.
- Takornariat timimikkut innarlerneqanngillat, taamaattorli pisumit annilaartitaarujussuarput, nakorsaq Hans Clemens oqarpoq, taanna ajunaartut ilaqutaannik takornariaqataasunillu ippassarli marloriarluni oqaloqatiginnittareerpoq. Takornariat angallammilu inuttaq suppussaanermik kingorna timimikkut nakorsarneqartariaqarsimanngillat imaaniinnerminnilu nillaallarujussuarsimanatik.
- Pisup kingunerisaanik annilaaqqapput imminnullu ataqatigiilluarlutik pisoq pillugu oqaloqatigiilluarput, nakorsaq Hans Clemens oqarpoq. Takornariat angutit marluk ajunaartut nuliatik ilagalugit angalaaqataapput.
-Ilaqutaasut nalaataqarnerloqataasullu qaqugukkulluunniit peqqissaavimmut saaffiginnissinnaanerminnik tikilluaqqusaapput, Nakorsaq Hans Clemens oqarpoq.
Uillartut maanna Ilulissat tungaanut ingerlaarput, Ilulissanullu tikikkunik palasimit najorneqassapput. Toqusut timaat suli Uummannami peqqissaavimmiipput, zinkimik illerfissiat Uummannamut tikeriarpata timaat Danmarkimukaanneqarumaarlutik.
