Annikitsukkaartumik aatsitassarsioriartuaartoqalerpoq
Misissuiffissatut sumiiffik akuersissuteqarfigineqartoq Nuup eqqaaniippoq akuersissullu tunniunneqartoq ukiunut marlunnut atuutissaaq. Qinnuteqaatit arlallit Kalaallit Nunaanni Aatsitassat pillugit Siunnersuisooqatigiinni tamatumalu kingorna Naalakkersuisuni akuersissutigineqartussat allaffissornikkut ingerlanneqarput, taama Aatsitassanut Ikummatissanullu Naalakkersuisoq nalunaarpoq.
Kalaallit Nunaanni annikitsuinnarmik aatsitassarsiorniarnernut maleruagassat upernaaq 2009 atuutitinneqalerput. Maleruagassat taakku nunaqavissunut annikitsuinnarmik aatsitassarsiorniartunut sammitinneqarput, taakku nunarsuarmi aatsitassarsiorfiutileqatigiiffissuartut aningaasaateqartanngimmata pisinnaassuseqartarnatillu. Maleruagassat pineqartut qulakkeertussaavaat annikitsuinnarmilluunniit aatsitassarsiornerugaluarpat tamatuma sillimaniarnikkut peqqissutsikkullu illersorneqarsinnaasumik avatangiisinillu mianerinnittumik ingerlanneqarnissaa. Tamakkorpiaat peqqutaallutik ujarlernerup nalaani qaartitsissutaasinnaasunik, imerpalasunilluunniit arrortikkuminaatsunik akulinnik imaluunniit atortut radio qinngornerinik atortulersuutitalinnik atuisoqaqqusaanngilaq.
Annikitsuinnarmik aatsitassarsiorniarluni qinnuteqarniaraanni piumasaqaataavoq Kalaallit Nunaanni najugaqartuunissaq kiisalu akileraartartuunissaq.
Annikitsuinnarmik aatsitassarsiorniarluni misissuinissamik akuersissummik tunniussaqarnermi ujaqqaneersunik aatsitassanik ujarlersinnaanissaq kisimi pineqarpoq, taamaattumillu uuliamik, gassimik imaluunniit radiop qinngornerinik pinngoqqaatinik akulinnik ujarlernissamut akuersissutaanani.
Aatsitassanut ikummatissanullu inatsisip maleruagassaa § 32 naapertorlugu nunaqavissut pisinnaatitaaffeqarput killilimmik ujaqqanik aatsitassanik akoqarsinnaasunik akuersissuteqarfigineqaqqaaratik katersisinnaanissamik, tamannalu annikitsuinnarmik aatsitassarsiorniarluni maleruagassat atuutitinneqaleraluartut allannguuteqartinneqanngilaq.
Annikitsuinnarmik aatsitassarsiorsinnaanermik periarfissat pillugit paasissutissat www.nanoq.gl–imi atuarneqarsinnaapput.
