Annguttut tamarmik siunissami peqataasinnaasariaqarput
Nunatsinni qimussimik pissartanngorniunnerit pingaarnersaanni Avannaata Qimussersuani Tunuminngaanit avanersuarmiillu qimussertartut ukiuni kingullerni peqataasinnaanngillat, angallannermut aningaasartuutit amerlavallaarnerat pissutigalugu.
Tamarmik peqataasinnaasariaqarput, Aleqa Hammond Siumut isumaqarpoq.
- Avannaata Qimussersua aningaasatigut nunatta karsianit tapiiffigineqarpat nunatsinni qimussertarfiusuni katersuuttarfiusut ataatsimoorfeqarnerulissapput, Aleqa Hammond oqarpoq.
- Avannaata Qimussersuaqartarnerani pinerit tamaasa qimussertartut tunumeersut avanersuarminngaaneersuullu peqataaneq ajorput aningaasassaaleqineq pissutigalugu, Siumut sinnerlugu siunnersuuteqartoq oqarpoq.
Taanna isumaqarpoq Avannaata Qimussersuaqartarnera nunatsinni kulturikkut oqaluttuarisaanermilu kingornussani pingaaruteqartoq.
Kalaallit Nunaanni Qimussertartut Kattuffiat ingerlatsinermut 150.000 kr-nik Naalakkersuisunit ukiormanna tapiiffigineqarput, suliniutinullu 75.000 koruuninik tapiiffigineqarlutik. Taakkuli naammanngillat, siunnersuuteqartoq Aleqa Hammond isumaqarpoq.
Timersortartut nunanut allanut unammiartoraangata aningaasanik tapiiffigineqartarput, Aleqa Hammond oqarpoq, apeqquserpaalu sooq aalisarnermik piniarnermillu inuussutissarsiuteqartut qimmillit tunuliaqutserneqarsinnaannginnersut.
Demokraatit siunnersuummut isumaqataanngillat, taakkua isumaqarput sukkaniuttarnerit Namminersorlutik Oqartussanit tapiiffigineqannngikkaluarlutik ingerlanneqarsinnaasut.
IA siunnersuummut itigartitsivinngillat, taamaattorli Avannata Qimussersuaqartarnermi aningaasartuutit aqunneqarnerisa patajaatsuunissaat qulakkeerneqarusuppoq ilaatigut naatsorsuutit kukkunersiukkat aamma missingersuutit saqqummiunneqartarnerisigut, soorlu timersornikkut kattuffiit allat aamma taamaattartut.
Ilaqutariinermut Kulture-mullu Naalakkersuisoq Mimi Karlsen siunnersuutigineqartumut akissuteqarluni qularpoq.
Mimi Karlsen inatsisartut ataatsimiinneranni ippassaq oqarpoq Kalaallit Nunaanni Qimussertartut Kattuffiat suliniutinut 75.000 kr-ninik ingerlatsinermullu 150.000 kr-nik naalakkersuisunit tapiiffigineqartartoq, taakkua saniatigut aningaasaliisartunit assigiinngitsunit tapiiffigineqartarmat.
Timersoqatigiit Kattuffianni siulittaasup Nuka Kleemann-ip oqarnera malillugu Kalaallit Nunaanni Qimussertartut Kattuffiat Timersoqatigiit Kattuffiannut ilaasortanngornissamut ukiut tallimat matuma siorna qinnuteqarsimasoq itigartinneqarsimasorli.
- Inuussutissarsiutinik ingerlataqartut Timersoqatigiit Kattuffiannut ilaasortanngorsinnaangitsut Qimussertartut Kattuffiat ukiut tallimat matuma siornatigut ilaasortanngorniarlutik qinnuteqarmata, itigartinnikuaagut, Timersoqatigiit Kattuffianni siulittaasoq Nuka Kleemann taamatut oqarpoq.
Kultureqarnermut Naalakkersuisoq Mimi Karlsen oqarpoq, Naalakkersuisut Qimersortartut Kattuffiannut ukiumut tapiissutigisartagaat 225.000,00 kr-niusut ingerlaannassasut.
Avannaata Qimussersua nunatta karsianit tapiiffigineqartarnissaanik siunnersuut Inatsisartut Kultureqarnermut Ataatsimiititaliaanut ingerlateqqinneqarpoq.
