Annerusumik paasissutissiisoqartassaaq

Alcoa pillugu suliassaq Inatsisartuni aallartinnerliorneqareersorlu, naalakkersuisunut ilaasortap Siverth K. Heilmannip annerusumik paasissutissiisarnissani neriorsuutigaa.
Allattoq Elisa Isaksen
marsip 06-at 2008 17:21

Illuatungiliuttut isumaqarput naalakkersuisut aalajangiinissamut saqqummiussaat naammaginanngitsut. Siverth K. Heilmann aperaarput piareersarnertik naammaginanngitsumik ingerlassimaneraat:

- Taama isumaqanngilanga. 2006-imiilli Alcoap pilersaarutaa killiffiillu pillugit Inatsisartut ataatsimiititaliallu malinnaateqqissaarneqarput. Siullermik aluminiumik aatsitsivissamik inissiivissatut innersuussuterput aalajangiiffigineqassaaq. Kiisalu aatsitsiviliornissamut atatillugu erngup nukiliorfiliornissat, ilaatigut aningaasartaannut tunngasut aamma aalajangiiffigisussaavavut. Alloriarneq tulleq pitinnagu tamakku peqqaartariaqarput.

Tassa ilaatigut avatangiisinut, piginnittussaanermut sulisoqarnermullu tunngasut, alloriarneq pereerpat tulliullugit nalilersugassaapput.

Imaanngilaq aatsitsiviliorneq erngulluunniit nukissiorfiit aqaguagunnguaq aalajangiiffigineqassasut. Kisianni alloriarnerit ataasiakkaat aqqutigisarlugit suliaq ingerlanneqarpoq.

- Suliassaq aatsitsiviliorniarnermut tunngasoq taama angitigisoq partiit naalakkersuisoqatigiittut kisiisa tunuliaqutaralugit pisinnaava?

- Taanna angorusunnanngeqaaq. Suliassap inuiaqatigiinnut taama pingaaruteqartigisup anguniarnerani suleqatigiinneq paaseqatigiinnerlu annerpaaq naalakkersuisunit angorusunneqarpoq. Suleqatigiikkusussuseqarpugut aamma pitsaanerpaamik angusaqarnissaq siunnerfigaarput, Siverth K. Heilmann oqarpoq.