Annersaasimasutut pineqaatissinneqarpoq
Nuummi angut 24-nik ukiulik Qeqqani Ilinniarnertuunngorniarfimmi ilinniartoq inspektorimik annersaasimasutut ilinniartooqatiminillu siorasaarisimasutut qaammatini pingasuni isertitsivimiittussanngorlugu Nuup Eqqartuussiviani pineqaatissinneqarpoq. Ilinniartup qaammatini sisamani isertitsivimmiittussanngortinneqarnissaa unnerluussisup piumasarisimagaluarpaa, illersuisuatali akiliisitsinissaq qaammatinilu pingasuni isertitsivimmiitinneqarnissaa piumasarisimallugu. Nuup Eqqartuussiviali aalajangerpoq, ilinniartoq qaammatini pingasuni isertitsivimmiittussanngortinneqassasoq.
Angutip 24-nik ukiullip pineqaatissinneqarnini sapaatip-akunnerini marlunni eqqarsaatigiumavaa, eqqarsarneranilu tigummigallarneqarnissaa politiit piumasarigaluarpaat, illersuisuatalu iperarneqarnissaa kissaatigigaluarlugu. Nuup Eqqartuussiviali aalajangerpoq, angut tigummineqarallassasoq, tamannali akueriumanagu illersuisuata Nunatta Eqqartuussivianut suliassanngortippaa, ullumilu aalajangiiffigineqartussanngorluni.
Angutip allakkatigut mianersoqqussummik tunineqarnini kamaatigalugu saassussisimavoq, ilinniarnertuunngorniarfimmit anisitaaneranik kinguneqartumik.
