Annersaasarneq qaffariarpoq

Tamakkiisumik isigalugu Nunatsinni annersaanerit nikeriangaarsimanngillat, sumiiffinnilu assigiinngitsuni kisitsisit assigiinngeqaat.

Qaqortumi annersaanerit amerleriarnerpaapput, tassa 40 procentimik annersaanerit amerleriarsimallutik.

- Malugisimavarput, tassa ukiup aallartinnerani annersaanerit arlariiusimapput, annersaanerillu taamaaginnassappata ukioq kingulleq kisitsisit angusussaassavagut,

Qaqortormiut Tasiilami pissutsit immaqa ilikkagaqarfigisinnaavaat, Kujataanilu Politeeqarfinnik aqutsisup Bent Ole Kleistip tamanna oqarpoq.

Tasiilaq Nuummiit innuttakinnerugaluaqisoq Tasiilami pinngitsaaliilluni arnerinerit pinngitsaaleeriarnerillu amerlanerusimapput.

2008-mi imigassamik kimittuunik tuniniaaqqusaajunnaarnerup kingorna Tunumi pinerluttuliortarnerit ikileriarput.

- Nalinginnaasumik pinerluttuliornerit, persuttaasarnerit pinngitsaaliillunilu arnerinerit ikileriarput, Tunumi Politeeqarfinni aqutsisoq Kristian Síngertât, Morgenavisen Jyllands-Postenimit taama issuarneqarpoq.

Tasiilami annersaasarnerit suli ikiliartorput, ukiup nutaap aallartinneraniit maannakkumut annersaanerit 19-iinnaasimapput, ukioq kingulleq piffissap taamaalinerani 33-usimagaluarlutik.

Qaqortumi annersaasarnerit amerliartornerat uninngippat Tasiilamisut iliortoqartariaqarnerpa?

- Isumaqarpunga siusippallaartoq imigassamik matusinissaq eqqarsaatigineqarnissaa, allatulli iliorsinnaavugut pinaveersaartitsilluta, annersaaffiusartunilu nuisanerulerluta, annersaanerit ikileriarnissaat anguniarlugu, Bent Ole Kleist taama oqarpoq.

Sisimiuni, Narsami aamma Ilulissani annersaanerit malunnartumik amerleriarput, Nanortalimmi Aasiannilu malunnartunik ikileriarlutik.