Annanniutit puttaqutit atisartakkat misissorneqalerput

Qallunaaq sakkutooq imarsiortoq Islandip eqqaani decembarimi annaassiniarnerup nalaani ipilluni ajunaarmat, taassuma angallammilu inuttaaqataasa arfineq-marluusut annanniutaat puttaqutit atisartakkat malinnit sequminneqarput. Qanoq ililluni taama pisoqarsinnaanersoq sakkutuut imarsiortut qullersaqarfiata maanna misissortinnialerpaa.
aggustip 10-at 2007 15:17

Annanniutit puttaqutit atisartakkat tamarmik innarlerneqarnerat eqqarsaatissiingaatsiarpoq. Taamaattumik immikkut ilisimasalinnit iternga tikillugu misissortinniarpavut, taamaalilluta ajunaarneq ilinniarfigisinnaaniassagatsigu, sakkutuut imarsiortut qullersaqarfianni sakkutuunut isumaginnittut qullersaat Henrik Andersen nutaarsiassaqartitsivimmut Ritzauimut taama oqarpoq.

Annanniutit puttaqutit atisartakkat sulinermi atorneqartartut silaannarmillu immertartut immamiileraangamik silaannarmik pullanneqartarput. Ajutoornerup nalaani puttaqutit arlallit siittarsimapput, annanniutillu ataatsip silaannarmik immerneqartarfia katassimavoq puttasinnaajunnaarlunilu.

Taamatut alianartumik ajutoortoqaraluartoq, sakkutuut ajutoortoqartillugu misissuisartuisa oqaatigaat annanniutit piumasarineqartunut naapertuuttuusut ajunaartoqarneranullu akisussaatitsisoqarsinnaanngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq