Annaassiniartartut timmisartup nakkarfianukaapput

Annaassiniartut namminnerlu piumassutsiminnik ikiuuttut tamaanga ingerlaarrapput. Inuit aqqunartitersimasut tallimat ajunaarsimasullu arlallit maannakkuugallartoq nassaarineqarput.

Ajunaarfimmit assilissat tv-meersut siulliit najoqqutarissagaanni amerlaqisut ajunaarsimanissaat annilaanngatigisariaqarpoq. Timmisartoq Airbus 321 ukiunik arfineq-pingasunik pisoqaassusilik timmisartortitseqatigiiffiup Air Blue-p pigisaata Islamabadip eqqaani orpipassuit aqqusaalutorisimavai aqqutikualu qorsuusimagaluartoq qernertuinnanngorsimalluni timmisartullu aseqqukuinik annertunerusunik takussaasoqarani.

Timmisartoq nunap kujataani illoqarfimmit umiarsualiveqarfiusumit Karachimit ullaaq tingivoq illoqarfiillu pingaarnersaata tungaanut nalunaaquttat akunnerini marlussunni timmereerluni ajutoorluni.

Nuissanik monsunip pilersitaanik pukkitsunik nuiasimavoq taamaattumillu isikkivilulluni timmisartullu pukkippallaamik timmilluni illoqarfik qulaassimallugu.

- TV-kkut assilisani takuneqarsinnaasutut sila pitsaavallaarsimanngitsoq Air Blue-mit oqaaseqartitaq oqarpoq, minnissamulli piumasaqaatit ajunngikkaluarput timmisartorlu ajoquteqarsimanani, taanna taama naliliivoq.

Takunnittuusimasoq oqaluttuarpoq timmisartoq makittarissisinnaajunnaarsimasutut isikkoqartoq ammorluinnarlu ingerlalluni tamatumalu kingornagut qaarpallarujussuarluni.

Kinguninngua inuit tamaanga qattunernut ingerlaarratilerput arlaatigut ikiuussinnaanissartik neriuutigigaluarlugu, mannali tikillugu inuit aqqunartitersimasut tallimaannaat ajunaarsimasullu ikinnerpaamik 20-t nassaarineqarlutik.

Tamaanngaannit ungasinngitsumi mittarfimmi Benashir Bhuto-mi maannakkorpiaq ajunaartunut qanigisaasut annilaarsimaqisut 100-likkaat ajunaarfimmit nutaarsiassaasinnaasunik utaqqerrapput. Inuit paatsiveerusimaartut paasiniaasarfimmiit paasiniaasarfimmut uteqattaarput soorunalimi sumik arlaanik paasissutissinneqarsinnaanatik.