Annaassiniartarnerit kigaallatsinneqarsinnaapput

Kangilinnguani sulisut Kangilinnguit angallatai atorlugit Narsarsuarmut angallanneqartariaqartarneri, aalisarnermut nakkutiliinermut ajoqusiinavianngitsut, annaassiniartarnernulli kigaallassaataasinnaasoq, Aalisarnermut Naalakkersuisoq Finn Karlsen oqarpoq.

- Nakkutilliineq satellitsit aqqutigalugit pitsarujussuarmik ingerlanneqarpoq, kisianni immaqali pisariaqavinngikkaluartumik immaqa Narsarsuarmut ingerlasariaqalersariaqarsimanerisa, apuunnerisalu nalaanni ajutoortoqassagaluarpat, annaassiniarneq eqqarsaatigalugu kinguasaatigineqarujussuarsinnaanerat taamaallaat aarlerinartutut isigaara, Finn Karlsen oqarpoq.

Naalakkersuisut Air Greenlandilu Kangilinnguani angallanneq pillugu ualeq ataatsimeeqatigiipput, oqartussat Radioaviisimit pissarsiariniarsarisimagaluarpagut iluatsinngitsumilli.

Danskit illersornissamut ministeriata Søren Gade-p Kangilinnguani pissutsit akuerisinnaannginnerarpai.

- Namminersornerullutik Oqartussat sumi timmisartuussisoqassanersoq aalajangiiffigisarpaat, taamaattumik naalagaaffimmit tapiiffigineqarnissartik ilimagissanngilaat, aamma aalajangiisoqannginnerani ilisimatinneqarsimannginnera eqqumiiginarpoq, Søren Gade tallimanngormat Radioaviisimut oqarpoq.