Annaassiniarnissaq politiit kisimik isumagisinnaassanngilaat
Umiarsuit takornariartaatit aasaru tikittussat ilaat 230-t, Royal Arctic Linemit isumagineqartussat, akornanni ataasiinnaq sikulimmi ilulialimmiluunniit angalanissaminut tulluarsagaavoq.
Takornariartitsivinniit oqaatigineqarpoq qujanartumik qaqutigorsuaq umiarsuit tusindtilinnik arlalinnik inuttallit nunatsinnukartartut. Nunatsinnullu takornariartitsisartut tamangajammik amerlanerpaagaangamik 400-nik ilaasoqartartut oqaatigineqarpoq.
Takornariat 400-t pallillugit ilaasoralugit ajutoortoqassagaluarpat qanoq piareersimasoqartiginersoq pillugu politimester Steen Silberg Thomsen ima oqarpoq:
-Takorlooruminaaqaaq qaquguluunniit Kalaallit Nunaata eqqaani takornarianik angallassisumik ajunaalertoqassagaluarpat qanoq aaqqiivigineqarsinnaassanersoq. Ajutoortoqassagaluarpalli pigisat suulluunniit atorlugit ikiuiartortoqarnissaq pisortanit isumagineqassaaq, politiit sakkutuullu nakkutilliisut ikioqatigiillutik inuinnaat ikiortigalugit pisumik. Tassa politiit, angallataallu, sakkutuut nakkutilliisut umiarsui, timmisartui qulimiguuæiutaalu tamaasa atorlugit, qulimiguulillit, umiarsuit pajuttut aalisariutillumi annaanneqarsinnaasunik ikiortarialinnullu ornigutsinneqassagaluarput, politimester Steen Silberg Thomsen oqarpoq.
Tassa takornariat 400-t pallillugit amerlassusillit imaaliallaannaq annaanniarnissaat ajornakusuussaqaaq, neriuutigiinnagassaavorlu ajutoorneq illoqarfiit arlaata eqqaani pigumaartoq, takornariat ilaat annaanneqarsinnaaniassammata.
Taamaammat takornarianik angallassisartut umiarsuit imminnut annaassinnaasariaqartut Steen Silberg Thomsen isumaqarpoq:
-Siullermik neriussaagut umiarsuaatileqatigiit issittumi angallassisut issittumut tulluarsaasimassasut ajutoortoqannginnerussammat.
Tassa pinngitsoornatik tulluarsaasimassasut kiisalu aamma umiarsuaatileqatigiit umiarsuit atukkatik annanniutinik naammattunik atortulersimassagaat, inuttat takornariallu ilaasut tamaasa annaassinnaanngorlugit.
Aammalumi soorunalimi issittumut tulluartunik tamakkua aaqqinneqarsimasariaqarput, politimester Steen Silberg Thomsen oqarpoq.
