Annaassiniarnissamut upalungaarsimaneq amigarpoq
Nalunaarusiaq Forum for Samfundets Beredskabimit (FSB-mit) suliarineqarpoq qaammatinilu aggersuni misissuinermi paasisat malitseqartinnissaat piareersarneqarpoq. Tamanna pivoq nunatsinni upalungaarsimanerup amigarluinnarnera malunnartinniarlugu. Nalunaarusiami erserpoq upalungaarsimaneq SAR ujaasinermut annaassiniarnissamullu pisariaqartinneqartunut amigarluinnartoq.
Nunatta isorartunerujussuat inoqarfiillu avinngarusimanerat pillugut umiarsuit takornariartaatit assartuutillu ajutoorsinnaanerannut upalungaarsimanissaq pisariaqarpoq, imaatigullu angallassineq annertusiartortillugu SAR atorlugu upalungaarsimaneq pisariaqartinneqarnerujartorpoq. Pisariaqartinneqartut ilagaat helikopterimik piareersimasoqarnissaa. Aammattaaq Islandimik suleqateqarneq annertusarniarneqarpoq Atlantikup avannaani ujaasinissamut annaassiniarnissamullu piareersimaneq naalagaaffeqatigiit pigeriigaat annertusarniarlugu.
Pissutsit ullumikkutut itsillugit Forum for Samfundets Beredskab isumaqarpoq umiarsuit nakkutilliissutit nunatta imartaaniittut sisamaasut siunissami tamarmik helikoptereqartariaqartut ilanngulluguli eqqaavaat tamanna kisimi naammanngitsoq. Tassami nunatta isorartunerujussua unammilligassaavoq annertooq. Ukiut 60-it kingulliit nunat tamat isumaqatigiissutaat malinniarlugit Danmarkip pisussaaffii naammassineqassappata allat ikiuuttariaqarput.
Marsip qaammataani nunanut allanut miniseri Villy Søvndal Verdensnaturfondenip issittoq pillugu isumasioqatigiisitsinerani oqarpoq sakkutuut aamma ikiuuttariaqartut issittumi Atlantikullu avannaani sakkutuujunngitsut kiffartuunneranni. Apeqqutaalerporli tamakku oqaasiinnaanersut imaluunniit Danmarkimi oqartussaasut akisussaaffitsik naammassiniarneraat.
FSB siunnersuuteqarpoq ataavartumik nunamiittussanik umiarsuarniittussanillu helikopterinik piareersimasoqartariaqartoq taakkulu Savalimmiuni Nunatsinnilu SAR pillugu upalungaarsimaneq isumagissagaat. Taamaattoqanngippat Savalimmiuni nunatsinnilu sakkuutooqarfiit umiarsuaataasa sumiinnissaannik pilersaarusiornissaq ajornakusuulersussaassaaq. Tamannalu pissutigalugu Danmarkip tungaaniit isumaliutigineqartariaqarsorineqarpoq helikopterit EH101-nik taaneqartartut marluk nunatsinnut inissinnissaat Islandip sineriaanik nakkutilliisut suleqatigalugit nunatta kujataa Savalimmiullu imartaat naammaginartumik upalungaarsimaffigineqarniassammata.
