Annaassiniarnermut periuseq nutarterniarpaat

Issittumi ajunaarnersuaqassangaluarpat ujaasinissamut annaassiniarnermullu periuseq nutaaq Canadami sapaatip akunnerata tulliani sungiusarneqassaaq.
marsip 31-at 2011 14:14

Canadap issittortaani ajornartorsiutit annerpaat angallannerup annertusiartuinnarneranik suliffissuillu ineriartortinneqarnerannik aallaaveqarput.

Ujaasitinneqartartut annaassiniartartullu manna tikillugu Canadap kujasinnerusortaani aallaaveqarmata issittumi pisariaqartinneqaleraangamik akunnerpaaluit ingerlaneranni aatsaat apuuttarput.

Pissutsit pitsanngorsarniarlugit Canadamiut sakkutuuisa ujaasinissamut annaassiniarnermullu periuseq nutaaq sapaatip akunnerata tulliani misilittassavaat. Misilioraaneq, taaneqartoq "Nunalivut" General Chretienip Qaujuittuq-miit aqussavaa, taannalu oqarpoq issittumi ajunaartoqartillugu annaassiniartut sapinngisamik piaarnerpaamik apuuttarnissaat siunertaasoq.

Misilittaanermi Inuit Rangers aamma ikiortiserineqarput. Taakkua sakkutuujunngitsut illersornissamut ikiuuttussatut inissisimapput nunaqarfinnilu amerlanerni inissisimallutik. Kisianni taakkua tassaanerusarput naggueqatta Inuit inuusuttaat utoqqasaallu naammattumik sungiusarneqanngitsut ilinniagaqarnikuunngitsullu.

Issittumi sumiluunniit ajunaartoqartillugu sakkutuut annaassiniaqataasullu akunnerit arfinillit qaangiutsinnagit apuuttarsinnaasarnissaat misileraanermi siunertarineqarpoq.