Annaassiniarnermik aqutsisoqarfittaaq sukkanerusumik iliuuseqarsinnaassaaq

Issittumi Sakkutooqarfik timmisartullu angallavissaannik ataqatigiissaarisartut Naviair Nuummi ataatsimoorlutik allaffeqarfeqalerput,  Joint Rescue Coordination Centre, Issittumi sakkutooqarfimmi atorfilittat qullersaat Jan Stripp oqaluttuarpoq.

Annaassiniartartut suleqatigiiaat pingasut akornanni ataqatigiissaarisalerneq sukkanerulissaaq, maannami oqartussaqarfiit marluinnaat akornanni oqaloqatigiittoqartalissaaq, tassalu politiit uagullu. Taamaattumik sukkanerulernissaa ilimanarpoq.

Aamma atuaruk Timmisartuaraq periarfeerunneqartoq: Ujaasineq aallartinneqalerpoq

Annaassiniarneq aallartinneqassatillugu, siunissami akisussaaffik politiinut imaluunniit Joint Rescue Coordination Centre-mut tunniunneqartalissasoq Issittumi Sakkutooqarfimmi atorfilittat qullersaat Jan Stripp oqarpoq.

Taassuma nalornisiginngilluinnarpaa assersuutigalugu timmisartuaraq privatimit pigineqartoq qanittukkut Tunumi periarfeerunneqartoq suleqatigiinnit allaffeqarfeqatigiinnit aqunneqarsimasuuppat nassaarineqarnissaa ajornannginnerusimassangaluarmat.Timmisartunik nakkutilliisut maanna Sakutuut imarsiortullu taamaallaat matumik igalaaminermik sanaamik avissaqquteqarput. Annaassiniartoqassatillugu matu ammassaaq.

- Qanittukkut Kulusuup eqqaani nuanninngitsumik pisoqarpoq, paasinarsimmat timmisartoq anngutinngitsoortoq nakkarsimasoq. Taama pisoqartillugu siunissami timmisartunik imarsiortunillu aqutsisoqarfiit qanittuararsuarmik suleqatigiissinnaapput, nunap immalluunniit assingi paasissutissallu siumut utimullu avitseqatigiissutigisinnaassagatsigit, pisortaq oqarpoq.

Joint Rescue Coordination Centre Nuummi umiarsualivimmiippoq, oktobarillu aallaqqaataani ammarneqarluni.